Владислав Ховалыг Тываның Национал хөгжүм-шии театрының сценазынга бараалгаткан «12» деп шии театрга ынак ресубликаның чурттакчыларынга эң эки белек болган деп демдеглээн. Республиканың Баштыңы шии мурнунда ооң тургузукчу режиссеру Никита Михалков-биле база ооң мастерскаязының шииде ойнап турар артистери-биле ужурашкан.
«Республиканың төп сценазынга шиини көргүскени дээш, мастерге өөрүп четтирдим. Никита Сергеевич боду база ооң труппазы тыва көрүкчүлерниң чылыг-чымчак хүлээп алыышкынынга өөрүп четтиргенин илереткеннер. Бо кежээ база көрүкчүлеривиске сөңнээн сагыш-сеткилдиң хайныышкыннары чүректеринге кезээде артар дээрзинге бүзүрээр мен» - деп, Тываның Баштыңы МАХ-та бодунуң каналынга дыңнаткан.
«Күжүгет Шойгу аттыг культура фондузу» болгаш «Улуг гастрольдар» федералдыг программа улуг хемчээлдиг шиини ооң ат-сураглыг актерлары-биле Тываже эккээринге дузалаан. Үнүүшкүннүг көргүзүгге белеткел эрткен чылын-на эгелээн. Никита Сергеевичиниң даалгазы-биле ооң бодунуң «Мастерская 12» театрының төлээлери республикага кээп, шиини көргүзер сценаны өөренип көргеннер.
Тывага кээп чораан ат-сураглыг режиссер чүс-чүс чылдарда бурунгу ужур-чаңчылдарын хевээр арттырган тыва культураны сеткилинден кайгап ханмаанын Владислав Ховалыг чугаалаан. Никита Михалков тыва сыгыт-хөөмейни уран чүүлдүң эң-не дээди хевири деп санап, улуг үнелелди берген.
Республика Баштыңының бодалы-биле алырга, шии IV делегей чергелиг буддийжи форумнуң программазынга тааржыр. Михалковтуң драмазы хосталга, кээргээчел чорук болгаш бергеге таварышкан шуут танывазы кижиге дуза кадарының аргазының дугайында ханы боданыышкын-дыр, ол дээрге буддизмниң кол утказын тургузуп турар мөңге үнелиг чүүлдер болур.
«12» деп ханы уткалыг драманың чогаадыкчызы боду бо дөмейлешкек чүүлдерни долузу-биле көргүскен. «Барыын чүк биле Европаның католиктериниң кылган чүүлдериниң соонда, бистиң православ шажынывыс исламга-даа, буддизмге-даа чоок апарган. Ынчангаш мында бис. Шынны чугаалап, дыңнап билир ужурлуг бис деп чүвени билип алыры чугула. Чурттуң бир кезээ чугаалап турда, өскези ыыт чок турбас ужурлуг. Бис – чаңгыс чон бис! Бөгүнде келир үевисти камгалап турар улуска деткимче болгаш багана болур ужурлуг бис! Чүгле мындыг таварылгада тиилелге бистии болур!» – деп, Никита Михалков Тывага көргүскен ооң шиизи буддийжи форумга тааржып турарын чугаалаан.