Август 19-та Кызылга IV Бүгү-делегейниң буддийжи форумунуң «Буддизм культуралар диалогунда: кижи төрелгетенниң келир үези» шөлүнге Наланданың буддизм шинчилелдериниң төвүнүң үндезилекчизи болгаш директору Рикардо Сасаки (Бразилия) журналистер-биле ужурашкан. Ол Бразилия биле Россияның культурлуг тускай догуннаашкынын хүндүлээр идеяны кады деткип болурун чугаалаан.
«Бразилия – улуг чурт-тур. Япония, Италия, Польша дээш, янзы-бүрү чурттардан хөй улус бисте чурттап турар. Культуралар база каш янзы. Россия ышкаш, бис база улуг чурт бис, ынчангаш өг-бүле, ниитилел болгаш салгалдар аразында харылзаалар бистиң национал культуравыстың чугула кезээ бооп артпышаан» - деп, Рикардо Сасаки айыткан.
Ооң бодалы-биле алырга, чурттар боттарының культурлуг бот-тускайлаңын кагбайн, эде чаартынып болур эргелиг. Россия биле Бразилия аңгы-аңгы чоннарның культурлуг бот-тускайлаңынга болгаш ужур-чаңчылдарынга хүндүткелди кады деткип болурун ол онзалап демдеглээн. «Россия биле Бразилия бо угланыышкынга каттыжып болур» - деп, Рикардо Сасаки демдеглээн.
Рикардо Сасаки Россия буддизмни хүндүлээри база чаңчылчаан үнелиг чүүлдерни кадагалап арттырары-биле улуг күжениишкиннерни салып турарын ол магадап чугаалаан. «Бо хүнде аңгы-аңгы чурттардан база диптерден хөй кижилер форумда чедип келген. Шупту шажыннарны хүндүлеп чорууруңарны эскердим. Ону дыка магадап тур мен» - деп, ол чугаалаан.