Россия Федерациязының Президентизиниң Сибирь федералдыг округта бүрүн эргелиг төлээзиниң оралакчызы Сергей Грызыхин Россияның Президентизиниң форум киржикчилеринге байыр чедириишкинин номчаан. «Россияның чоннарының чаңгыс деминиң чылында Тыва Республикада – орус буддизмниң билдингир төптериниң бирээзинде шуулганның эртип турары ужур-уткалыг. Бурунгу тыва чер чүс-чүс чылдарның байлак төөгүзү, кайгамчыктыг бойдус чурумалы, чылыг-чымчак сеткил-хөөннүг чону, эвилең-экииргээ-биле алдаржаан. Ында эң үнелиг культура болгаш сүлде-сүзүк өнчү-салгалын камныг кадагалап, өгбелериниң амыдыралынга болгаш бот-тускай ужур-чаңчылдарынга хүндүтклдеи аныяктарга дамчыдып, кижизидип чоруур».
Күрүне баштыңы бодунуң байыр чедириишкининде российжи сангха бүгү делегейниң буддийжи ниитилелиниң чарылбас кезээ болуп, националдар аразында эп-найыралды кадагалаарынга, буянныг болгаш чөптүг чоруктуң идеалдарны нептередиринге улуг үлүг-хуузун киирип турарын күрүне баштыңы база демдеглээн. Форум даштыкы буддийжи шажын организациялары болгаш эртем школалары-биле шажынчы, энерел сеткилдиг болгаш ниити айтырыглар талазы-биле үре-түңнелдиг кады ажылдажылганы идепкейлиг сайзырадып, өске-даа адырларда төлевилелдерни болгаш эгелээшкиннерни кады боттандырарынга боттуг киржип турар. Президентиниң байыр чедиришкининде форумнуң чүгле Россияга эвес, а делегей чергелиг буддийжи ниитилелге чугулазын онзалап демдеглээн.
IV делегей чергелиг буддийжи форумга бүгү делегейниң булуңнарындан буддийжи төлээлер чыглып, буддизмниң, буддийжи культураның, философияның болгаш практиканың хөгжүлдезинге хамаарышкан амгы үениң айтырыгларын сайгарып, аңгы-аңгы чурттарның буддийжи организацияларының аразында кады ажылдажылганы быжыглаан. 2023 биле 2024 чылдарда Бурятияга, а 2025 чылда Калмыкияга баштайгы үш шуулган эрткен. Бо чылын форумну Сибирьниң буддизм төвү – Тыва Республика эрттирип турар.
Аңаа Россия Федерациязындан, Азиядан, Европадан, Африкадан, Латин Америкадан эртемденнер, шажын болгаш хөй-ниити ажылдакчылары, эрге-чагырга органнарының төлээлери, эксперттер киржип турар. Форумнуң программазында эртем, ажыл-агыйжы, культурлуг хемчеглер: пленарлыг хурал, эртем шөлдери, дискуссия шөлдери, мастер-класстар, делгелгелер, ол ышкаш «Ак лотостуң тоолчургу чугаалары» деп ужур-чаңчылдар фестивалы, «Өлчей» регионнар аразының национал культуралар фестивалы, буддийжи кино болгаш кудумчу культураларының фестивальдары кирген.
Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Сибирьниң болгаш бүгү делегейниң чоннарының культурлуг өнчү-салгалын болгаш ужур-чаңчылдарын кадагалап арттырарының чугулазын, ол ышкаш кожа-хелбээ харылзааларны быжыглаары – регионга аңгы-аңгы чоннар болгаш шажын-чүдүлгелер төлээлериниң эп-найыралдыг кады ажылдажылгазын чаңгыс эвес удаа демдеглээн. Бүгү-делегейниң буддийжи форуму чоннар аразында найыралды, бүзүрелди болгаш билчилгени быжыглаарынга, күрүнелер аразында харылзааны сайзырадырынга, сүлде-сүзүктүң үнелиг чүүлдерин болгаш төөгү-культурлуг өнчүзүн камныг кадагалаарынга дузалаар дээрзинге бүрүн эргелиг төлээ бүзүреп турар.
Форум Россия Федерациязының Президентизиниң Администрациязының база Россияның Чазааның деткимчези-биле эрттирип турар.