Бангладештиң Атиша Дипанкара тураскаалдыг комплекстиң ламазы, хүндүлүг Рупан Баруа Карунананда Теро форумнуң «Буддизм культуралар диалогунда: кижи төрелгетенниң келир үези» деп шөлүнге журналистер-биле ужурашкан. Ол чуртта аңгы-аңгы культураларның кады тааржып чурттаарынга бүзүрел биле хүндүткелдиң канчаар дузалап турарын чугаалаан. Ол ышкаш Россия шупту шажыннарны деткип турары дээш мактап, Бангладеш биле Россияның быжыг найыралының чылдагааннары хөй деп немээн.
«Бангладешке дөрт аңгы культура, дөрт хевирниң индуизми бар. Бангладеште мусульманнар база бар. Кижи бүрүзү эки чурттап чоруур. Бангладеште национал культурага бүзүрел болгаш хүндүткел бар деп болур» - деп, Хүндүлүг Рупан Баруа Карунананда Теро хөй-ниити амыдыралының кол үндезиннерин сайгарып тургаш чугаалаан.
Хүндүлүг Рупан Баруа Карунананда Теро Россияның чаңчылчаан үнелелдерже хамаарылгазы Бангладеш-биле кайы хире дүгжүп турарының дугайында айтырыгга харыылап тура, Бангладештиң чоннарының аразында культурлуг ылгалдар бар деп демдеглээн, ынчалза-даа, Россияда ышкаш, кижи бүрүзү бот-боттарын хүндүлежип чоруур. Россия Федерациязы культурлуг болгаш шажыннар аразында диалогка Бангладеш көскү партнер бооп шыдаар деп, ол бүзүрелдиг чугаалаан.
«Россияда Бангладештен хөй кижилер бар деп билир мен. Москвада хөй студентилер өөренип турар. Бо чоокку үеде найыралдажып алырывыска бүзүрээр мен, чүге дизе бис ниити көрүштүг болгаш чаңгыс шажынныг бис — буддизм» - деп, лама немээн.
Делегей чергелиг буддийжи форум – бүгү делегейден буддийжи төлээлерни чыып, буддизмниң, буддийжи культураның, философияның болгаш практиканы сайзырадыр амгы үениң айтырыгларын сайгарып, аңгы-аңгы чурттарда буддийжи организацияларның аразында делегей чергелиг кады ажылдажылганы быжыглаар хемчег-дир.
Бурятияга 2023 биле 2024 чылдарда, а Калмыкияга 2025 чылда баштайгы үш шуулганны эрттирген. Россияның Буддийжи чаңчылчаан Сангхазы, Бурят Республиканың Чазаа, Калмыкия Республиканың Чазаа база Буддийжи өөредилге болгаш эртем-шинчилелдерге деткимче фондузу, Роконгресстиң фондузу – хемчегниң организаторлары.