Тываның Баштыңы IV делегей чергелиг буддийжи форумга киржири-биле республикага келген тоолчургу «Орус витязьтарның» командазының ужудукчулары-биле ужурашкан. Олар Тыва Республика хүнүнде, Кызылдың дээринге бедик мергежилдиң оюн-көргүзүүн бараалгатканнар.
Владислав Ховалыг «Орус витязьтар» командазынга республикага аалдап келгени дээш база оларның көргүзүү чурттакчыларынга уттундурбас сактыышкыннарны артырганы дээш четтиргенин илереткен. Аалчылар чылыг-чымчак хүлээп алыышкын болгаш база ажылды бедик деңнелде организастаанын демдеглээн.
Эш-хуу ужуражылганың киржикчилери авиацияның төөгүзүн болгаш ужудукчу бүрүзүнүң профессионал карьеразын сонуургап дыңнааннар. Ужудукчулар республиканың дугайында бодалдарын база үлешкеннер. Тыва бойдузунуң чаражы-биле кайгаткан, ынчалза-даа регионнуң дээринге ажылдаары эң-не улуг кичээнгейни негээн: даглыг черлер ужудукчуларга езулуг шылгалданы берген.
Владислав Ховалыг тыва чоннуң онзагай культуразын, ужур-чаңчылдарын хандыр сонуургап, республикаже аян-чорукчулап база катап кээр кылдыр команданы чалаан.
Августуң 17-де, Кызылдың чурттакчылары ужудукчуларның агаарга шоузун база катап көөр аргалыг болган. Бөлүктүң кежигүннериниң чугаазы-биле алырга, ужудукчулар чаа программаны белеткап алганнар.
«Орус витязьтар» Кызылдың дээринге кайгамчык ужудуушкуннары-биле республиканың чурттакчыларын болгаш аалчыларын база катап кайгадыптар. Сагыш-сеткилге артып каар кайгамчык чүүлдер дээш четтирдивис!» - деп, Владислав Ховалыг бодунуң блогунда бижээн.
«Орус витязьтар» пилотаж командазының албан езузунуң каналында дыңнатканы-биле алырга, август 17-де Кызылга «Россияның рыцарьлары» пилотаж командазының көргүзүг ужудуушкуну болур.
15:00 шакта — агаар-бойдусту шинчилээн ужудуушкуннар.
17:00 шакта — «Орус витязьтар» командазының шоу көргүзүглүг ужудуушкуну.
Кызылдың эриинде «Азия төвү» деп тураскаал районунга ужудар.
Ужудуушкун организакчылары орук шимчээшкинининге шаптыктавайн, база хөй кижилерниң тырлырын болдурбас дээш, таарымчалыг хостуг черлерни тып алырын сагындырган.
Агаар-бойдустуң байдалы база айыыл чок чорук негелделеринге дүүштүр ужудуушкуннуң үези өскерлип болур чадавас.