Тыва Республика хүнүнде республиканың хөгжүлдезинге улуг үлүг-хуузун киирген аңгы-аңгы адырларның ажылчыннарын шаңнап-мактаары чаңчыл болган. Улусчу чогаадылга бажыңынга байырлыг езулалда республиканың Баштыңы Владислав Ховалыг боду күрүне шаңналдарын тывыскан.
Регионнуң удуртукчузу Россияның Чоннарының чаңгыс деминиң чылында Тываның күрүне тургузуунуң 105 чылын демдеглеп эрттирип турарын демдеглээн. «Бөгүн республика улуг чаартылгаларның болгаш экономиктиг шапкын өзүлдениң оруунче кирген. Президентиниң болгаш федералдыг чазактың деткимчези-биле үлетпүрнү сайзырадып, социал адырны чаартып, инвестицияларга таарымчалыг байдалдарны тургузуп турар бис» - деп, ол демдеглээн. Владислав Ховалыг улуг энергетика төлевилелдерин боттандырар, чуртталга тудуун калбартыр, мелиорация программаларын эгелээр, болбаазырадылга бүдүрүлгелерин тудар талазы-биле кол чедиишкиннерни база демдеглээн. Ол хемчеглер амдыызында эки түңнелдерлиг деп дарга демдеглээн: ажыл чок чорук эвээжээн, а орулгалар чоорту өзүп турар.
Владислав Ховалыг тускай шериг операциязының киржикчилеринге болгаш фронтуга ачы-дузазын көргүзүп чоруур чурттакчыларга улуу-биле четтиргенин илереткен. Олар патриотчу чоруктуң үлегер-чижээ-дир деп демдеглээн. Бөгүнгү хемчег тургузукчу күш-ажылдың болгаш өг-бүлениң ыдыктарының чылында эрттирип турарын республика баштыңы база демдеглээн: «Өг-бүлеге болгаш күш-ажылга хүндүткел бистиң республикавыстың хөгжүлдезиниң кезээде үндезини болуп келген болгаш болуп артпышаан» - деп, ол түңнээн.
Көдээ ажыл-агый ажылдакчылары, башкылар, эмчилер, тудугжулар, журналистерге, культура ажылдакчылары, спортчулар дээш аңгы-аңгы адырларның төлээлери күрүне шаңналдарынга төлептиг болган. Шаңнал алганнарның аразында күш-ажылдың хоочуннары, аныяк специалистер бар. Владислав Ховалыг езулал дугайында бодунуң блогунда мынча деп бижээн: «Тываның амгы төөгүзүн күш-ажылыңар-биле тургузушкан силер. Чартык чүс чыл ажыг эиг кожа, кады чурттап чоруур өг-бүлелерге онза өөрүп четтиргенивисти илередип тур бис. Силерниң шынчы болгаш мерген угаанныг үлегериңер аныяктарга эң-не эки чижек-тир». Республика Баштыңы шаңнал алганнарга байыр чедирип, быжыг кадыкшылды, өг-бүлениң чаагай чоруун, аас-кежикти, чуртунуң болгаш төрээн чериниң чаагай чоруунга чаа-чаа чедиишкиннерни күзээн.
Тываның көдээ ажыл-агый эртем-шинчилел институдунуң селекция болгаш үрезин бүдүрүлгезиниң лабораториязында улуг эртем ажылдакчызы Раиса Ламажап бодунуң адырында хөй чылдарда ак сеткилдиг ажылы, бедик билиг-мергежили дээш «Тыва Республиканың көдээ ажыл-агыйының алдарлыг ажылдакчызы» хүндүлүг атты алган. Тыва Республиканың Арга-арыг камгалал төвүнүң директору Сергей Сапелкин «Тыва Республиканың алдарлыг ажылдакчызы», «Саяннар» Тываның хөгжүм болгаш танцының национал театрының балет артистери Венера Ооржак биле Чинчи Салчак «Тыва Республиканың алдарлыг артизи», Тыва Республиканың чыынды командазының спортчу белеткел төвүнүң спортчу хүрешке улуг тренери Сат-Ок Кенден «Тыва Республиканың алдарлыг тренери», «Тыва» күрүнениң телерадиодамчыдылга компаниязының теле-радиодамчыдылгазының информастыг программалар албанының удуртукчузунуң оралакчызы Константин Куцеваловка «Тыва Республиканың алдарлыг журнализи», Кызылдың Президентиниң кадет училищезиниң улуг методизи Ирина Ховалыгга «Тыва Республиканың өөредилгезиниң алдарлыг ажылдакчызы», Шагаан-Арыг хоорайның тускай эртемнерни ханы өөредир 1 дугаар школазының курлавыр төвүнүң удуртукчузу Софья Көрген-оол «Тыва Республиканың алдарлыг башкызы», республиканың психиатрия эмнелгезиниң физиотерапевт эмчизи Зинаида Күдерек «Тыва Республиканың алдарлыг эмчизи» хүндүлүг аттарга төлептиг болганнар.
«Өг-бүлениң үнелиг чүүлдерин кадагалап арттырганы дээш» Тыва Республиканың медалын өг-бүлениң үндезин ыдыктарын кадагалап, өг-бүле институдун быжыглааны дээш, Улуг-Хем кожуундан өг-бүле болуп чурттааш, 50 ажыг чыл болган Сандак-Доржу Кыргысович биле Любовь Түлүшевна Агбааннарны база Кызылдан Чамбал-оол Капсыл-оолович база Чечек Кенденовна Дугар-оолдарны шаңнаан.
«Тыва Республиканың мурнунга ачы-хавыяаазы дээш» Тыва Республиканың медальдары-биле Росгвардия Тыва Республикада эргелелиниң начальниги, полицияның полковниги Алексей Корниенко, Тыва Республиканың иштики херектер сайыды, полицияның генерал-майору Юрий Завьялов, «Россияның Чогаалчылар эвилелиниң» Тывада регионалдыг салбырының кежигүнү Александр Ондар, «Тыва» күрүнениң телерадиодамчыдылга компаниязының теле-радиодамчыдылгазының информастыг программалар албанының начальниги Виталий Кузнецов олар шаңнаткан.
«Шылгараңгай күш-ажылы дээш» Тыва Республиканың медалын культура болгаш уран чүүлдүң хоочуну Алдын-оол Сагдыга база Каа-Хем кожууннуң өөредилге эргелелиниң школа өөредилгезиниң методизи Галина Сарыгларга тывыскан.
Тыва Республиканың Чазааның чанында Тываның гуманитарлыг болгаш тускай социал-экономиктиг шинчилелдер институдунуң башкарыкчы эртем ажылдакчызы – чогаал секторунуң эргелекчизи, филология эртемнериниң кандидады Зоя Самданны хөй чылдарда ак сеткилдиг ажылы болгаш эртемни хөгжүдеринге үлүг-хуузу дээш «Буяна-Бадыргы» орденниң III чадазы-биле шаңнаан.