Владислав Ховалыг бо улуг хемчег - IV делегей чергелиг буддийжи форумну организаcтап эрттиреринге дузалажыр волонтерлар-биле ужурашкан. Тываның Баштыңы ужуражылга соонда, Россияның 43 регионнарындан келген эки турачылар делегейниң он-он чурттарындан аалчыларны төлептиг уткуп, хүлээп алырынга дузалаар дээрзинге бүзүрелин илереткен.
«Татарстан база Калмыкиядан эгелээш Санкт-Петербург биле Кемеровога чедир бүгү чурттан идепкейжилер биске дузалажып чедип келген. Күзелдиг кижилер дыка хөй болган — 1400 кижиниң аразындан Россияның 43 регионнарындан чүгле 350 кижи шилиттинген. Оларның аразында Калмыкияга эрткен форумга ажылдаан арга-дуржулгалыг волонтерлар база бар" - деп, Владислав Ховалыг бодунуң блогунда бижээн.
Волонтерлар командазынче кирерде, кордакчылар амыр эвес орукту эрткенин сагындыраал. «Алдын-Херелдиң камгалакчылары» өөредилге программазы-биле олар тыва черниң төөгүзүн, буддийжи ужур-чаңчылдарны, аалчылар уткуурунуң чурумун, форум логистиказының чажыттарын шиңгээткеннер. Оон айтырыг-харыылар база чугаалажылга таварыштыр шыңгыы шилилдени эрткен.
Улуг ажылдың түңнелинде 350 эки турачылардан команда тургустунган. Оларның 300-ү – Тываның үндезин чурттакчылары. Оон өскеде, Россияның өске регионнарындан 50 киржикчи база келген. Ынчалдыр тус чер чурттакчыларындан болгаш Калмыкиядан волонтерлар, Москва болгаш кожа-хелбээ Кузбасстан арга-дуржулгалыг специалистерден тургустунган команданы чыып алган.
Аңгы-аңгы назы-харлыг болгаш сонуургалдарлыг кижилер оларның аразынче кирген. Эки турачыларның эң бичиизи 15 харлыг Сайгал Самбуу - «Баштайгылар шимчээшкининиң» активчизи. Эң-не дуржулгалыг волонтер кылдыр «Мөңгүн» волонтерлар шимчээшкининиң төлээзи, Новосибирскиден Раиса Леушина – эң-не арга-дуржулгалыг волонтер болган.
"Ужуражылга бедик деңнелге аалчылар хүлээп алыышкынын көргүзер дээш Россияның булуңнарындан эки турачыларны чаңгыс черде чыгган. Орукту эрткен – аалчылар уткуурун өөренгеш, ам шуут белен кижи бүрүзүнге чоргаарланып тур бис!" – деп, Баштайгылар шимчээшкининиң регионалдыг салбырының удуртукчузу, форумнуң волонтерлар куратору Эртине Куулар республика баштыңы-биле ужуражылганың түңнелин дыңнаткан.