«Айыыл чок хоорай» программа боттандырылгазы-биле чаңгыс четкиже кошкан 140 камерадан тургустунган видеохайгаарал системазы Тываның найысылалын долузу-биле хайгаараар. Дериг-херекселдерни эптеп салып турган “Мегафон” компанияның төлээлери системаның арга-шинээн республика Баштыңынга таныштырган.
Владислав Ховалыг мониторинг четкизиниң эптээн дериг-херекселин шенеп ажылдатканын социал четкилерде дыңнаткан. «Угаанныг» система шынап-ла кайгамчык-тыр. Караам-биле көрген болгаш, кем-херек үүлгедиишкиннерин ажыдары элээн дүргедээрин, чурум-үрээшкиннеринге удур профилактика күштелип, хоорай чурттакчыларының болгаш аалчыларының айыыл чок чоруу экижиир боор деп билип тур мен» - деп, Тываның Баштыңы «Айыыл чок хоорайның» ажылынга хамаарыштыр бодалдарын үлешкен.
ТР-ниң Чурагайлыг хөгжүлде яамызының медеглээни болза, амгы үеде Кызылдың кудумчуларында 20 камераларны тургускаш, ажылын шенээн, ам 70 камераны эптеп турар. Чыл төнчүзүнге чедир бүдүн хоорайга 140 ажыг камераларны салыптар, оларның аразында кижилерни болгаш автотранспорт дугаарларын танып билир камералар база бар.
Төлевилел езугаар бүдүн хоорайга харылзааның 50 км удазын-оптиктиг кабелин немей шөйер. «Айыыл чок хоорай» системаны республиканың амгы чурагайлыг экосистемазы-биле каттыштырар, ынчан информастыг технологтиялар ачы-дузазының шынары элээн бедиир. Керээ чарган чер декабрьга чедир бүгү комплексти ажыглалче киирип, республикага хүлээдип бээрин хүлээнген.