Понедельникте, август 17-де, республиканың найысылалынга эгелээр IV-кү делегей чергелиг буддийжи форум бүдүүзүнде, Тываның Баштыңы Владислав Ховалыг тус черниң телекомпаниялар төлээлери-биле ужуражып, улуг хемчегге хамаарыштыр журналистерниң айтырыгларынга долу харыыларны хууда берген.
«Тыва» КТРК болгаш «Тува 24» телеканалдарының корреспондентилери республиканың шуулганга белеткелди сонуургап, кандыг аалчыларны манап турарын, ол улуг хемчээлдиг болуушкундан регион чүнү чедип алырын айтырган. Владислав Ховалыг регионнуң төвүнде, ооң чоок-кавызында болгаш элээн каш кожууннарны хаара тудар улуг белеткел ажылды адакталганын дыңнаткан. Тыва бодунуң аалчыларын уткуп алырынга белен деп болур.
Регионнуң удуртукчузу белеткел ажыл-чорудулгазының акшаландырыышкын айтырыын кичээнгейге ап, ону манап турганын демдеглээн. "Бюджетте форумну организастаары-биле дорт акшаландырыышкын көрдүнмээн болгаш, ол чок. Кызылдың чаагайжыдылгазын орук фондузу болгаш хоорай бюджединиң планнаан акша-хөреңгизи-биле кылып турар" - деп, дыңнаткан.
Регионнуң инвестиция, үлетпүр, кадр курлавырларының арга-шинээн хөгжүдеринче угланган кады ажылдажылга дугуржулгазын Тываның Чазаа биле «Ареал» бөлүү чай эгезинде чарганын сагындырып, «Ареал» компания болгаш ооң удуртукчузу Владислав Свиблов форумнуң белеткелинге улуг деткимчени көргүскенин демдеглээн. Бо үнелеп четпес үлүг-хуузу дээш инвесторга сеткилиниң ханызындан четтиргенин ол илереткен.
Владислав Ховалыг ам болур хемчегге бүгү-ле белеткелдер үезинде организакчылар-биле кады кылган ажылы дээш журналистерге өөрүп четтиргенин илереткен. «Бо бүгү айлар дургузунда олар чурттакчы чонга форум дугайында долу болгаш дарый медээлерни берип келгеннер» - деп, Баштың демдеглээш, информастыг чепсек төлээлеринге чедиишкиннерни болгаш бо улуг хемчегниң шөлдеринден солун дамчыдылгаларны дамчыдарын күзээн.