Тываның Баштыңы төрээн черинге ынак, ооң байлак төөгүзүнге, культуразынга, өгбелерден дамчып келген езу-чаңчылдарын хүндүлеп, чоргаарланып чоруур бүгү-ле кижилерни каттыштырган хүн – Тыва Республика хүнү-биле республиканың чурттакчыларынга байырны чедирген. Бо чыл Тыва Арат Республиканың бирги Үндезин Хоойлузун хүлээп алганындан бээр 105 чыл болган төөгүлүг болуушкун-биле холбаалыг деп регионнуң удуртукчузу демдеглээн. 1921 чылда Бүгү Тываның тургузукчу хуралынга бот-догуннаан күрүнениң таваа салдынган.
“Катаптаттынмас бойдус чурумалдыг Тывавыстың күш-ажылчы, салым-чаяанныг, быжыг тура-соруктуг, төрээн черинге бердинген чону эң-не кол эртинези чораан болгаш болуп арткан. Республика бөгүн бурунгаар бүзүрелдиг хөгжүп турар. Силерниң тургузукчу күш-ажылыңар, тура-сорууңар болгаш хей-адыңар ачызында чаа бажыңнар, школалар, уруглар садтарын тудуп, хоорайлар болгаш суурларны чаагайжыдып, инфраструктураны сайзырадып, хөй националдыг чонувустуң катаптаттынмас культурлуг болгаш сүлде-сүзүк өнчүзүн кадагалап арттырып алган бис” – деп, Владислав Ховалыгның байыр чедириишкининде бижээн.
Тываның болгаш бүгү Россияның амыр-тайбың келир үезин хандырып, бөгүнде Ада-чуртун эрес-дидим камгалап чоруур чаңгыс чер чурттугларывыска өөрүп четтириишкинниң онзагай сөстерин дамчыткан. “Силерниң кижи бүрүзүнге чоргаарланып чоруур бис” – деп, баштың демдеглээн.
Республикада амыдырал-чуртталганың шынарын бедидеринче угланган мурнувуста сорулгалар хөй деп сагындырган. Кандыг-даа бергелерни ажып эртип, төрээн черивистиң чечектелиишкини дээш эң-не нарын планнарны амыдыралга кады боттандырып шыдаар дээрзинге ол бүзүрелин илереткен.