Тывада кадыкшылын хайгаарап, профилактиктиг шинчилгелерни эртип ап турар кижилер саны өскен. Чыл эгезинден бээр 76408 кижи эмчи шинчилгезин болгаш диспансеризацияны эрткен, чылда планнаанының 52,6 хуузу. Эрткен чылга деңнээрге, 13 муң кижи хөй.
«Тываның чурттакчылары боттарының кадыкшылынче кичээнгейни салып, диспансеризация болгаш профилактика хемчеглерин доктаамал эртип ап турар апарган. Мындыг харыысалга аарыгны үе шаанда илередир аргалыг» - деп, Тываның Баштыңы Владислав Ховалыг демдеглээн.
Шупту шинчиткен 18 муң ажыг кижи профилактиктиг, ол ышкаш улус улустуң чамдык бөлүктеринде 57848 кижи диспансеризация шинчилгелерин эрткен.
Кижиде аарыгның демдектери билинмээнде-ле, ону эге чадазында илередири – ындыг шинчилгелерниң кол сорулгазы. Бо чылын республиканың чурттакчыларынга диспансеризация үезинде 40 муң хире аарыглар илереттинген. 36,5 муң ажыг кижини учетта алган. Аарыы бир дугаар илереттинген кижилерни эмчилер хайгааралынче алган.
Көвей кезиинде хан эргилдезиниң аарыглары илереттинген – 17356 таварылга. Эмчилер 3815 ижин-шөйүндү аарыгларын база 864 тыныш органнарының аарыгларын тодараткан. Аарыг кижилерни үе шаанда диспансер учедунда тургускан. Божуп-көвүдээр назы-харлыг хамаатыларны ханы шинчилээр база хынаар ажылдар уламчылап турар. Шак ындыг хыналдалар үре-сады кадыкшылынга уржук чедирер хире аарыгларны болгаш айыылдарны дүрген тодарадырынга дузалаар.
«Республиканың шупту чурттакчыларын боттарының кадыкшылынга камныг болурун кыйгырып тур мен. «Узун болгаш идепкейлиг назын» национал төлевилел күүселдези-биле ол сорулгага бүгү-ле таарымчалыг байдалдар бөгүн тургустунган» - деп, Владислав Ховалыг демдеглээн.