Тываның Баштыңы Владислав Ховалыг тускай шериг операциязынга киржип турар дайынчылар-биле ужурашкан. Республиканың Чазааның бажыңынга эрткен ужуражылга эш-хуу байдалда болганын регионнуң удуртукчузу социал четкилерде бодунуң блогунда дыңнаткан. Аңаа аңгы-аңгы шериг кезектеринден болгаш округтардан дайынчылар келген.
Республика Баштыңы чугаа үезинде, фронтуда оперативтиг байдалды база тылдан деткимчениң чугулазын сонуургаан. «Кижи бүрүзү фронтунуң мурнуку одуруунче эккелген бодунуң хууда төөгүзү-биле үлешкен. Бистиң шериглеривистиң эрес-дидим болгаш коргуш-сыныш чок чоруунга кым-даа чоргаарланыр» - деп, Владислав Ховалыг чугаалаан.
Дайынчы эрлер бүгү тыва чонга сеткилиниң ханызындан өөрүп четтиргенин илередип, гуманитарлыг дузаны доктаамал чорудуп турарларга мөгейигни дамчытканын регион баштыңы онзалап демдеглээн. Ооң ачызында олар бажыңындан чугула херек дериг-херекселдер болгаш чылыг хептер, чагаалар, камгалалдар болгаш мөргүлдер дээш, тускай чагыг езугаар чүүлдерни ап турар. Шак мындыг чиге ажылдаан дорт харылзаа оларның артында күштүг тыл бар деп бүзүрелди берип турарындан, оларның күчү-күжү улгадып, дайынчы хей-аъды быжыгып келир-дир деп, шериг албанныглар бодалы-биле үлешкеннер.
«Сеткил-чүрээмниң ханызындан кижи бүрүзүнге дайынчы даалгаларны күүседиринге чедиишкиннерни, а эң-не кол чүүл – бажыңнарынче кадык-чаагай, онча-менди чанып кээриңерни күзедим» - деп, республика баштыңы чугаалаан.
Чоокта чаа - июльдуң 30-де Тывадан чоруткан гуманитарлыг чүъгүн фронтуда чеде берген. Чүъктүң ниити деңзизи 45 тонна болган. Ол Донецк, Луганск, Запорожье, Херсон, Белгород, Курск областарже угланган. Шериглер элээн каш УАЗ автомобильдерни, чиик машиналарны, мотоциклдерни, чеди электрочадаг-тергелерни, 35 бензохирээлерни, 30 генераторну, 200 ажыг камуфляж четкилерни, ол ышкаш эм-таңны болгаш аъш-чемни алганнар. Республика Баштыңының даалгазы езугаар «Мавик 4 Комбо» деп 7 квадрокоптерни, «Диспетчер» деп 5 видеоперехватчиктерни, 10 рацияны садып, шупту транспорт аймаан кывар-чаар чүүл-биле база хандырган.
«Республиканың чурттакчылары чагыс улуг өг-бүле ышкаш, бистиң оолдарывыстың бажыңнарынче кадык-чаагай чанып кээрин сеткилинден бүзүреп, чаагай күзээшкиннерни кижи бүрүзү чалбарып турарын мен» - деп, Владислав Ховалыг демдеглээн.
Тускай шериг операциязы эгелээнден бээр, Тывадан мурнуку шугумче ниитизи-биле 500 ажыг тонна гуманитарлыг дузаны чоруткан.