.jpg)
Бөгүн Кызылда транспорт бүдүрүлгелериниң төлээлеринге ГАЗ биле ПАЗ маркалыг 12 чаа автобустарның дүлгүүрлерин тывыскан. Ажыл-агыйны хүлээдип бээр езулалга республиканың Баштыңы Владислав Ховалыг, ажыл-агый аайы-биле регионда келген РФ-тиң Транспорт яамызының автомобиль болгаш хоорай транспортунуң талазы-биле күрүне политиказының департамент директорунуң оралакчызы Виктор Остриков автобустар дамчыдар езулалга киришкен. «Амыдырал инфраструктуразы» национал төлевилелдиң «Хөй-ниити транспортун хөгжүдери» федералдыг программаның езугаар «Ареал» компанияның спонсорлаашкыны-биле автобустарны садып алган.
«Республикага чугула болуушкун-дур, чүге дизе бис хөй-ниити транспортун доктаамал чаартып турар бис. Президент чиге даалганы берген: 2030 чылга чедир ажыглаар хуусаазы эртпээн транспорттуң үлүү 85 хире хуу болур ужурлуг. Ол чүүл пассажирлерниң айыыл чок болгаш таарымчалыг чоруун хандырар ужурлуг. Федералдыг чазак-биле ону чедип алыр дээш доктаамал кады ажылдаар бис» - деп, Владислав Ховалыг МАКС-та бодунуң каналынга дыңнаткан.
Хөй-ниити транспортун хөгжүдери – регионнуң бүгү-ле сөөртүлгелеринде, ооң иштинде пассажир аргыштырылгазында көвей кезиинде автомобиль транспорту ээлеп турар республиканың эрге-чагырга органнарынга эң кол болгаш чугула угланыышкыннарның бирээзи болуп турар. Автобус парыгы долу күчүзү-биле ажылдап турар болгаш, ол дүрген үрелиичел бээр.
«Амыдыралга инфраструктура» национал төлевилелдиң «Хөй-ниити транспортун хөгжүдери» федералдыг программада Тыва Республика бир дугаар киржип турар. Программа 50 муң ажыг чурттакчылыг хоорайларлыг регионнарга транспорт өртээниң 40 хуузунга федералдыг бюджеттен субсидия акшазын аңгылап, шимчеп чоруур составты садып алырын сүмелээн. Регионалдыг бюджеттен кады акшаландырар чарыгдалдарның хөй кезиин дуглаарынга инвесторнуң саң-хөө деткимчези дузалаан.
Владислав Ховалыг мооң мурнунда Виктор Остриков-биле, Тывада автотранспортту хөгжүдер болгаш сайзыраңгайжыдар планнарны чугаалашкан турган. Федералдыг ведомствонуң төлээзи хөй-ниити транспортунуң парыгын чаартып база орук четкизин хөгжүдер талазы-биле республиканың ажылдаанын бедии-биле үнелээн.
Тывада эрги автобустарны чаа автобустар-биле план езугаар солуп эгелээниниң түңнелинде, сөөлгү беш чылда пассажирлер аргыжылгазының автопарыгы 60 хуу чаартынган.
Владислав Ховалыгның даалгазы-биле, чаа автобустарны ыраккы кожууннарда муниципалдар аразының маршруттарынче үндүрер. Республиканың Транспорт яамызы чурттакчыларның дилээнге даянгаш, «Кызыл – Суг-Аксы» база «Кызыл – Хандагайты» маршруттар-биле Сүт-Хөл болгаш Өвүр кожууннарже пассажирлер аргыжылгазын катап эгелээрин көрүп турар.