Чыл эгезинден бээр Тывада 25790 кижи үре-сады кадыкшылының эмчи шинчидилгезин эрткен. Регионалдыг Кадык камгалал яамызының дыңнатканы болза, 2,2 муң ажыг чурттакчы немелде эмчи шинчилгезиниң ийиги ээлчеглиг чадазынче бижикти алган.
Барыын-Хемчик, Мөңгүн-Тайга, Өвүр, Улуг-Хем кожууннар чурттакчылары быжыглаттынганы республиканың 1 дугаар эмнелгезиниң консультативтиг-диагностика поликлиниказында диспансеризацияны хөйү-биле эртип турар.
Эмчи шинчилгезин эрткен эр улустуң саны көвүдээни демдеглеттинген. Чылда 20302 кижини шинчиир пландан, чыл эгезинден бээр 11303 эр кижи эмчилээн. 800 эр кижи шинчилгениң ийиги чадазын база эрткен. Херээженнер аразындан 14487 кижини хынаан, планныг сорулганың 67 хуузу. Ийиги ханы шинчилгеже 1409 херээженни чоруткан.
«Узун болгаш идепкейлиг назын» национал төлевилел-биле 18-тен 49 харга чедир назылыг эр, херээжен кижилер ыяап-ла медицина камгаладылгазының полизинге үре-сады кадыкшылының диспансеризациязын халас эртип турар. Ооң сорулгазы – иштелиринге, иштиг үезинде болгаш чаш төлдүң кадыкшылынга салдар чедирип болур аарыгларның болгаш кемнерниң уржуктарын үе-шаанда тодарадыры.
Тускай мергежилдиг эмчилерниң сүмелэни-биле үре-сады кадыкшылынга хамааржыр шинчилелди эртип турар. Бир эвес аарыг кижиге немелде шинчилелдер херек болза, ийиги чадаже чорудар.
Кызылда республиканың 1 дугаар эмнелгезиниң консультативтиг-диагностика поликлиниказында болгаш республиканың консультативтиг-диагностика төвүнге диспансеризацияны эртип ап болур. Кожууннар чурттакчылары төп кожуун эмнелгелериниң болгаш муниципалдар аразының эмнелге төптериниң поликлиникаларынга, ол ышкаш фельдшер-акушер пунктуларынга болгаш эмнелге амбулаторияларынга шинчидер.