Эрткен неделяда тускай шериг операциязының зоназынче Тывадан гуманитарлыг ачы-дузаның база бир чүъгүн чоруткан. Хереглелдерни Тыва шериг албанныгларның дилээ езугаар чыгдынган дериг-херекселдер болгаш техника аймаан чүдүрген чүък машиналарны ол угда девискээрлерже аъттаныпкан. Республиканың Баштыңы Владислав Ховалыг тускай операцияның киржикчилериниң ачы-дузаны хүлээп ап турарын көргүскен видеону парлаан.
Тываның Чазаа Улусчу фронтунуң регионалдыг салбыры-биле кады гуманитарлыг дуза чыылдазын организастаан. Кожууннар, сайгарлыкчылар, волонтерлар, ажылчын коллективтер аңаа идепкейлиг киришкен.
«Эрткен неделяда Улусчу фронт-биле кады гуманитарлыг дузаламчының база бир чүъгүн чоруттувус. Чүък машиналары үш угланыышкынче үнүпкен. Тура дүшпес «УАЗ-буханка», чиик машиналар, мотоциклдер, электрочадаг-тергелерни чүдүрген. Оон аңгыда 35 бензохирээ, 30 хире генераторлар, 200 хире камгалал четкилерин дамчыткан бис. «Содействие» регионалдыг фонду шугуму-биле квадрокоптерлер, видеоперехватчиктер, харылзаа дериг-херекселдери база мототехниканы аңгы саттывыс» - деп, Владислав Ховалыг чугаалаан.
«Содействие» фондузу республика Баштыңының даалгазы езугаар, харылзаа болгаш разведкага ажыглаар дериг-херекселдерни: «Мавик 4 Комбо» деп 7 квадрокоптер, «Диспетчер» деп 5 видеоперехватчикти, 10 рация, 3 мотоцикл, 7 электрочадаг-тергени аңгы садып алган. Фонд оон аңгыда, чүък машиналарының оруун бензин-биле бүрүн хандырган.
Автоколоннаның маршрудун кол девискээрлер: Донецк болгаш Луганск угланыышкыннарын, Запорожье-биле Херсон, ол ышкаш Курск база Белгород областар кылдыр тургустунган.
«Хүндүлүг чаңгыс чер чурттугларым! Амгы үеде Курск облазында турар Ленинград шериг округунуң дайынчыларының мурнундан өөрүп четтиргенивисти илередип тур бис. Силерниң биске чоруткан бүгү чүүлдериңер — квадрокоптерлер, детекторлар, электрочадаг-тергелериңер, рациялар — бистиң дайынчы даалгаларывысты элээн чиигедип турар. А эң-не кол чүүл, бистиң дайынчыларывыстың амы-тынын камгалаарынга дузалыг. Шупту кады күштүг бис, Тиилелге бистии болур!» деп видеонуң бирээзинде бижиткен.
Тываның Баштыңы бодунуң ээлчээнде дайынчыларны деткээни дээш, республиканың чурттакчыларынга база катап өөрүп четтиргенин илереткеш, бо чүүл фронт биле тылдың демниг чоруун бадыткап турар деп демдеглээн.