Республиканың Кадык камгалал яамызы санитарлыг авиация албанының сөөлгү чартык чылда ажылын түңнээн. Ведомствонуң дыңнатканы-биле алырга, алды ай дургузунда санавиация специалистери 82 ужудуушкунну кылган, ооң ачызында 171 аарыг кижи, ооң иштинде 52 чаштар (оларның 15-и бир хар четпээн чаштар) тускай эмчи дузазын үезинде алган.
Эмчи бригадалары хөй кезиинде аар кемдээшкиннерлиг аарыг кижилерже: орук озал-ондаанга когараан, мээниң хан-дамыр эргилдези хенертен баксыраан, ол ышкаш айыылдыг бөлүкке хамааржыр иштиг херээженнерже болгаш божуур иелерже ужуп, дузазын көргүскен.
Санитарлыг ужудуушкуннарның кол угланыышкыннары Тожу, Барыын-Хемчик, Тере-Хөл база Мөңгүн-Тайга кожууннар болган.
Саниарлыг авиация иштики маршруттардан аңгыда, регионнар аразынга база ужуткан. Аарыг кижилерге чогуур дузаны чедирери-биле Красноярск, Новосибирск, Иркутск хоорайларның тускай эмнелге төптеринче чаңгыс эвес удаа ужуп үнген.
Санитарлыг авиация – «Узун болгаш идепкейлиг назын» национал төлевилелдиң кол угланыышкыннарының бирээзи. Ол албанның хөгжүлдези эң ыраккы болгаш чедери берге черлерниң чурттакчыларынга дүрген эмчи дузазын үе шаанда алыр арганы берген. Тывада ыраккы болгаш чедери берге черлерде, дыка хөй чурттакчылыг суурларда, кижиниң амы-тынын камгалаарынга санавиация улуг рольду ойнап турар.
Оон аңгыда, санавиация айыылдыг байдалга таварышкан кижилерниң амы-тынын камгалап ап болур. Чижээ, Чеди-Хөл кожуунга болган сөөлгү таварылга – оларның бирээзи. Август эгезинде, Таңды-Уула сыннарынче үнүп бар чораан экспедиция үезинде, маршруттуң ийи киржикчизиниң ханының базыышкыны улгаткан, а бирээзиниң буду кадырлы берген. Камгалакчылар караңгыда бедик черже көдүрлүп үнгеш, оларга бирги дузаны чедирип, куду бадарын организастаан. Когараан үш кижини санавиация вертоледу-биле республика эмнелгезинче чедирген.