.jpg)
Аппарат хуралында, Чазак Даргазының оралакчызы Алексей Сазан-оолду Тыва Республиканың Чазааның Даргазының оралакчы албан-дужаалында хевээр артырбышаан, өөредилге сайыдынга томуйлаан дугайында шиитпирни хүлээп алганын Владислав Ховалыг дыңнаткан.
Республика Баштыңының чугаазы-биле алырга, Сазан-оол чаа албан-дужаалга башкыларның шалың төлевириниң системазын федералдыг негелделерге дүүштүрер хөй санныг нарын айтырыглар-биле ажылдап, өөредилге адырын удуртур.
Владислав Ховалыг кадр шиитпирин чарлап тура, Чазак Даргазының оралакчызындан өөредилге адырының ажылының үре-түңнелин бедидеринге идиглиг удуртулга шиитпирлерин дүрген хүлээп алырын манап турарын айыткан.
Алексей Сазан-оол күш-ажылчы ажыл-чорудулгазының хөй кезиин төрээн Чеди-Хөл кожуунунга эрттирген, аңаа өөредилге черлеринге улуг арга-дуржулганы алганын сагындыраал. Сайлыг ортумак школазының директору, Чеди-Хөл кожууннуң өөредилге эргелелиниң удуртукчу бооп аңгы-аңгы чылдарда ажылдаан. 2023-2025 чылдарда Чеди-Хөл кожууннуң Төлээлекчилер хуралын даргалаан. 2025 чылдың февральдан эгелеп Таңды кожууннуң чагырга даргазынга ажылдап, бодун арга-дуржулгалыг, харыысалгалыг удуртукчу кылдыр көргүскен. Ол 2025 чылдың сентябрьда республиканың Чазааның Даргазының оралакчызынга томуйлаттынган.
Алексей Сазан-оолдуң башкарып турганы спорт болгаш аныяктар политиказының угланыышкыннарын Чазак дарганың оралакчылары Орлан Сарыглар болгаш Артына Бузур-оол тус-тузунда харыылаар.