Тываның эрге-чагыргазы инвалидтерге чедингир хүрээлеңни тургузарынче база бир базымны кылган: республикада социал инфраструктура болгаш эргежок чугула ачы-дузаларже шаптараазын чок кирерин хайгаараар системаны ажылдадып эгелээн. Бо неделяда регионнуң чазаа муниципалдыг тургузуг бүрүзүнде шаптараазын чок шимчээшкинниң деңнелин үнелээр чурумну бадылаан.
Комиссия объекти бүрүзүнге хыналданы чорудуп, мониторингини кылыр. Хынаар ужурлуг объектилер санынче кадык камгалал, өөредилге, спорт, дыштанылга болгаш садыг-саарылга черлери, ол ышкаш социал албан болгаш социал хандырылга организациялары, чуртталга-коммунал айтырыгларын харыылаар албан черлери кирген. Оон аңгыда, транспорт инфраструктуразы, ооң иштинде вокзалдар, аэропорттар болгаш өске-даа логистика белдирлери кирип турар.
Комиссияның сорулгазы – кирер эжиин, иштики шимчээшкинин, тускай зоналарны, санитар-гигиена өрээлдерин канчаар кылганын комплекстиг хынап, информацияның чедингирин көөр. Үнүүшкүннүг хыналдаларның түңнелинде, амгы байдалды бадыткап, адаптация хемчеглерин айыткан документини тургузар. Инвалидтерниң хөй-ниити организацияларының төлээлериниң чөпшээрели-биле оларны комиссияже киирер.
Мониторингиниң кол сорулгазы – хүрээлелдиң амгы байдалын демдеглеп алырындан аңгыда, четпестерни эдип алыр кылдыр, ону чайладыр хуусааларны айтып, удуртулга шиитпирлерин хүлээр кылдыр илереттинген шаптараазыннарның тодаргай анализин белеткээш, тус чер чагыргаларынче киирер.
Система доктаамал ажылдаар: хемчеглерни боттандырган соонда, шаптараазыннарны чайлатканын хынап, катап база хыналдаларны чорудар. Инвалидтерниң боттарындан удур харылзаа база херек: оларның санал-оналдары херек кырында таваржып турар бергелерин билип алырынга дузалаар. Херек болза, шаптараазын чок шимчээшкинни хандырар планнарже өскерилгелерни болгаш немелделерни киирип болур.
Инвалид кижилерниң ажыглалында объектилерниң чедингирин хайгаараар хыналданы чылда эвээш дизе чаңгыс катап чорудар. Ол ажылды дүүштүрүп хынаарын Тываның Күш-ажыл болгаш социал политика яамызынга онааган. Яамы инвалидтерге болгаш өске-даа шимчээшкини кызыгаарлыг бөлүктүң кижилеринге объектилерниң болгаш ачы-дузаларның чедингиринге хамаарышкан улуг илеткелди чылдың-на ниитилелге таныштырар хүлээлгелиг.