Августуң 8-те, Тываның Баштыңы Владислав Ховалыг Таңды кожуунче ажылчын үнүүшкүннү кылган. Ол Таңды кожуунда элээн каш социал объектилерни, ооң иштинде ында амгы үеде улуг септелге ажылдары кидин түлүк чоруп турар төп кожуун эмнелгезин хынаан. «Узун болгаш идепкейлиг назын» национал төлевилел езугаар септелге ажылдары майда эгелээн. Эмнелгениң шалазын, чылыдылга системазын, канализация хоорзаларын, электри четкизин адырган. Керээ езугаар ажылдар келир чылын доостур. Ындыг болзажок эмнелгениң поликлиниказы, чыдар салбыры база дүрген дуза салбыры ажылдап, эмчилер чурттакчыларга эмчи дузазын көргүзүп турар.
Республиканың Баштыңы амгы үеде улуг тудуг-септелге ажылдары чоруп турар эрги Культура бажыңынга база четкен. Ону эде чаарткан соонда, көдээ шии театры ынаар көжер. «Чыл төнчүзүнге чедир чылыдылга системазын салыптарга, иштики шеверлел ажылдарны эгелээр. Чаартынган театр 2027 чылда эжиктерин ажыдып, чурттакчыларга өөрүшкүнү сөңнээр» - деп, Владислав Ховалыг чугаалаан.
Республиканың удуртукчузу Дүрген суурда өскүстер бажыңнарының тудуун хынаан. Эргижиреп сандараан тудугларның орнунга чаа, делгем, амгы үениң бүгү негелделери дүүшкен чуртталга бажыңнарын туттунуптар. Ниитизи-биле 44 бажың тудуу чоруп турар.
Тываның Баштыңы ол-ла сургакчылаашкын үезинде, амгы үеде үшкү сезону ажылдап турар «Орлёнок» биле «Байлак» уруглар лагерьлеринге база четкен.
Август айда «Орлёнок» уруглар лагеринде 80 хире уруг дыштанып, чаа өөредилге чылының бүдүүзүнде күш алырлар. Тываның Баштыңы янзы-бүрү мөөрейлер болгаш спортчу хемчеглерден аңгыда, англи, көрей, кыдат дылдар бөлгүмнери бар лагерьниң программазын сонуургаан. «Дыштанылга үезинде мындыг өөредилгелерни уруглар чииги-биле амырап шиңгээдир деп башкылар чугаалаан» - деп, Владислав Ховалыг демдеглээн.
Владислав Ховалыг амгы үеде 230 ажыг школачылар дыштанып турар «Байлак» лагериниң корпустарын болгаш чемненир черни кезип, эрткен чылын туттунган чаа эмнелге пунктузун көрген. «Уругларның өөрүшкүзүн көргеш, бодумну сактып келдим: мен база бичии тургаш, ийи катап маңаа дыштанган мен. Дыка-ла солун үелер» - деп, регионнуң удуртукчузу сактыышкынын үлешкен.