Тываның эрге-чагыргазы делегейниң IV буддийжи шуулган үезинде айыыл чок чорукту болгаш хөй-ниити корум-чурумун хандырар дээш күштелдирген хемчеглерни ап турар. Август 17-ден 20-ге чедир республиканың найысылалынга болуп эртер шуулган 12 даштыкы чурттардан, ол ышкаш Россияның аңгы-аңгы регионнарындан аалчыларны уткуп алыр.
Тываның Баштыңы Владислав Ховалыг делегацияларның кээриниң бүдүүзүнде, корум-чурум камгалаар ведомстволарның төлээлерин чыып, шуулган үезинде айыыл чок чорукту болгаш хөй-ниити корум-чурумун хандырар хемчеглерни чугаалашкан. Ооң социал четкилерде бижээн дыңнадыы-биле алырга, шуулганның шупту шөлдеринче онза кичээнгей салдынып, шыңгыы контрольга тудар.
«Аңаа ажылдаар ажылдакчыларның санын база каяа канчаар турарын бадылаан. Видеохайгаарал камералары болгаш техниктиг хыналда дериг-херекселдери доктаамал ажылдап, тодаргай түңнелдерни бээр ужурлуг. Келир неделяда кол девискээрлерге сөөлгү хыналдаларны чорудар. Ол ышкаш корум-чурум тударынче улусу дружиналарны хаара тудар» - деп, Владислав Ховалы бодунуң блогунда бижээн.
Республика Баштыңы делегей чергелиг хемчегни таптыг болгаш организастыг эрттирери-биле боттарының угланыышкыннарынга демниг ажылдаарын шупту ведомстволарга дааскан.