Тываның Баштыңы Владислав Ховалыг Тудугжу хүнүнүң бүдүүзүнде, тудуг адырының ажылдакчыларынга болгаш хоочуннарынга профессионал байырлалы-биле байырны чедирип, регионнуң хөгжүлдезинге киирген үлүг-хуузу дээш четтиргенин илередип, мергежилиниң тергииннеринге күрүне болгаш ведомство шаңналдарын тывыскан. Улусчу чогаадылга бажыңынга Россияда Тудугжу хүнүнүң 70 чыл оюнга тураскааткан байырлыг хемчег болуп эрткен.
«Бо чылын тудугжунуң хүнүн 70 дугаар демдеглеп турар бис. Бо дээрге онзагай, тургузукчу мергежил-дир. Тудугжулар куруг черлерде школаларны, эмнелгелерни, бүдүн микрорайоннарны тудуп үндүрүп турарлар. Тываның аян-хевирин өскертип, харылзашкак адырларны хөгжүдеринге бо күш-ажыл чаа аргаларны ажыдып турар» - деп, регионнуң удуртукчузу демдеглээн.
Кү-ажылынга шылгараан ажылдакчыларга бедик мергежили, хөй чылдарда ак сеткилдиг күш-ажылы база тудуг адырын хөгжүдеринге үлүг-хуузу дээш, федералдыг болгаш регионалдыг шаңналдарны тывыскан. Тываның Тудуг яамызының ажылдакчылары Риана Монгуш биле Урана Канзываа Россияның Тудуг болгаш чуртталга-коммунал ажыл-агый яамызының хүндүлел бижиктерин байырлыг байдалда алган.
«Суугу» кызыгаарлаттынган харыысалгалыг ниитилелдиң директору Белек Донгурак, бетончузу Каадыр-оол Ооржак, республиканың Өөредилге яамызының ажыл-чорудулга хандырылгазын деткиир төптүң кол специализи Валерий Хомушку, хуу сайгарлыкчы Херел Аңгыр-оол, «Молоток» КХН-ниң чиңгине директору Эрес Дуваа база «Легион» КХН-ниң чиңгине директору Буян Салчак Тываның Баштыңының Өөрүп четтириишкин бижиктеринге төлептиг болганнар.
Тыва Республиканың Тудуг яамызының килдис начальниги Роксана Доспан-Самбу, яамының планнаашкын болгаш экономика эргелелиниң кол специализи Севил Сат, Күрүне тудуунга экспертиза эргелелиниң күрүне эксперттери Шончалай Ооржак база Чимис Чамзыга Тываның Баштыңының Хүндүлел бижиктерин тывыскан.
«Восток» кызыгаарлаттынган харыысалгалыг ниитилелдиң чиңгине директорунуң оралакчызы Андрей Гриченко «Тыва Республиканың алдарлыг тудугжузу» хүндүлүг атка төлептиг болган.
Байырлыг хемчег үезинде, республиканың хөгжүлдезинге быжыг үндезинни салып, бөгүнде аныяк салгалдың специалистеринге боттарының билиг-мергежилин болгаш профессионал арга-дуржулгазын дамчыдып чоруур тудуг адырының хоочуннарынга өөрүп четтириишкинниң онзагай сөстерин илереткен.