Т
ываның Баштыңы бөгүн 70 харлап турар Россия Федерациязының алдарлыг журнализи, Тыва Республиканың культуразының алдарлыг ажылдакчызы Александр Сан-оолович Шоюнга юбилейи-биле байырны чедирген. Владислав Ховалыгның байыр чедириишкининде, хоочун журналистиң салым-чаяанының хөй талалыын, литература болгаш культураның хөгжүлдезинге киирген үлүг-хуузун, ол ышкаш бодунуң ажылынга бердингенин, коллегаларының аразынга үнелелди, чаңгыс чер-чурттугларының аразынга хүндүткелди чаалап алганын демдеглээн.
«Александр Сан-оолович кол редактор бооп, тыва парлалганың хөгжүлдезинге улуг үлүг-хууну киирген. А ооң ажылдары аныяк салгалга төрээн черинге ынакшылды оттуруп, а чогаадыкчы ажыл-чорудулгазы республиканың культурлуг өнчүзүн кадагалап чоруур» - деп, Баштыңның байыр чедириишкининде бижээн.
Республика Баштыңы Александр Сан-ооловичиге быжыг кадыкшылды, чогаадыкчы узун орукту, төрээн тыва чонунуң чаагай чоруу дээш хей-аътты күзээн.
Александр Сан-оолович Шоюн 1956 чылдың август 4-те Тыва автономнуг областың Тес-Хем кожууннуң Берт-Даг суурга төрүттүнген. Берт-Даг ортумак школазын дооскаш, чурттуң кол чогаадыкчы дээди өөредилге черлери: Б.В. Щукин аттыг Дээди театр училищезинге база А.М. Горький аттыг Литература институдунга профессионал мергежилдерни чедип алган.
Александр Шоюннуң күш-ажылчы оруу каш янзы профессионал ажыл-чорудулганы хаара туткан. Тываның хөгжүм-шии театрынга артист, режиссернуң дузалакчызы, чогаадыкчы кезээниң эргелекчизи болуп ажылдаан. «Тываның аныяктары» солуннуң корреспондентизи, килдис эргелекчизи, кол редакторнуң оралакчызы – харыысалгалыг секретары албан-дужаалдарга ажылдап чораан. Оон аңгыда Тыва АССР-ниң Министрлер Чөвүлелиниң Даргазының дузалакчызы база СЭКП-тиң Кызыл хоорай комитединиң инструктору болуп база ажылдаан.
Ооң допчу намдарының кол чадазы чаа тургустунган «Сылдысчыгаш» уруглар солунунуң кол редактору кылдыр Александр Шоюнну томуйлаан 1990 чыл-биле чырый холбаалыг. Кандыг-даа материалдыг баазазы чок черден ажылды эгелеп алгаш, парлалга үндүрүлгезин чырыкче доктаамал үнерин организастап, ооң материалдыг-техниктиг чепсеглелин быжыглап шыдаан.
Тыва журналистиканың хоочуну бо хүнде уругларның «Алдын-Кушкаш», «Салгынчыгаш» сеткүүлдериниң база «Алдын эртине» уругларның ном үндүрер чериниң кол редакторунда ажылдап чоруур.