Россияның Чазааның Даргазы Михаил Мишустин Кызылга ажыл-агыйжы сургакчылаашкын үезинде, «Восток» КХН-ниң демир-бетон заводунга чораан. Тыва Республиканың бот-тускай социал-экономиктиг хөгжүлде программазындан күрүне деткимчези-биле завод 2023 чылда бүдүрүлге күчү-күжүн улгаттырган. Бөгүнде бүдүрүлге 120 ажыг аттыг продукцияны бүдүрүп, регионнуң демир-бетон рыногун хандырып турар. Россияның тудуг болгаш чуртталга-коммунал ажыл-агый сайыды Ирек Файзуллин база Тываның Баштыңы Владислав Ховалыг заводтуң бүдүрүлге чорудуун таныжып көрген.
Бүдүрүлгени деткээни боттуң тудуг материалдарын бүдүрерин хөгжүдеринге улуг идиг болган. Регионнуң удуртукчузу Владислав Ховалыгның демдеглээни болза, завод бо хүнде чуртталга тудуунуң хемчээлин көвүдедип, чаа школалар, уруглар садтары, эмнелге тудугларын шапкын тудуп үндүрер арганы берип турар.
Заводтуң тудуг материалдары — тавааның база хана блоктары, кырын дуглаар плиталар, орук болгаш тротуар бордюрлары, цилиндрлер, тротуар даштары — орук инфраструктуразында болгаш хоорайның шөлдерин чаагайжыдарында база ажыглаттынып, соңгаардан эккээр материалдарны солуп турар.
77,5 га шөлдүг бүдүрүлгеде ниити күчү-күжү 800 куб метр бетон холуксаазы холуур ийи цех бар, үш бүдүрүлге цехтери болгаш шинчилел лабораториязы ажылдап турар.
Компанияның чиңгине директору Сергей Уюсов 2020 чылдан 2026 чылдың июньга чедир демир-бетон продукцияның бүдүрүлгезиниң хемчээли 329,6 муң кубометр чедип, чылда темпини 23 хуу улгаттырганын таныштырган. Ооң-биле чергелештир дузалал материалдар бүдүрүлгези база көвүдээн: ол-ла үе иштинде ооң ниити хемчээли 1 085,45 муң куб метр чедип, чылда ортумак өзүлдези 12 хуу болган.
«Восток» КХН — чуртталга бажыңнары болгаш социал албан черлери (школалар, эмнелгелер, уруглар садтары) тудары, регионалдыг болгаш тус чер автомобиль оруктарын, ооң иштинде Р-257 федералдыг орукту тудуп, ажаап-карактаары болгаш септээри; бетон бүдүрүлгези база сай-довурак дээн ышкаш дузалал материалдары казып тыварын сайзырадыры-биле ажылдап турар хөй ажыл-чорудулгалыг бүдүрүлге.
Бүдүрүлге орук объектилериниң тудуунда болгаш чаартылгазында, ол ышкаш Кызылда хөй-ниити черлерин чаагайжыдар, ооң иштинде тротуар плиткаларын, бордюрларны хандырып, салыр, девискээрлерни ногаанчыдар ажылдарны хандырып турар.
Бүдүрүлге регионнуң күш-ажылчы курлавырының элээн кезиин ажыл-биле хандырып турар. Амгы үеде компания 1471 кижи ажылче хаара туткан.