Август 31-де Тыва Республиканың Чазаанга, Тудугжу хүнүнге тураскаадып, шаңнал-макталдар тыпсыр езулал болуп эрткен. Тываның Баштыңы Владислав Ховалыг база ол үеде республикага сургакчылап чораан Россияның тудуг болгаш чуртталга-коммунал ажыл-агый сайыды Ирек Файзуллин адырның шылгараан төлээлеринге күрүне шаңналдарын тывыскан.
Владислав Ховалыг байырлыг езулалды ажыдып тура, чыылганнарга бо чылын 70 дугаар демдеглеп турар тудугжунуң хүнү-биле байырны чедирген. Республиканың тудуг ажыл-агыйы сөөлгү чылдарда көскү түңнелдерни көргүзүп, регионнуң хөгжүлдезинге идигни берип турарын республика Баштыңы демдеглээн: «Кызылда чаа чурттакчылыг кварталдар база чаа микрорайоннар тыптып келген. «Таарымчалыг хоорай хүрээлеңин хевирлээри» федералдыг программа езугаар он-он чаа хөй-ниити шөлдери туттунган. Эрткен үш чылда 9 муң ажыг олуттуг 11 чаа школаларны тутканы – улуг чедиишкин» - деп, Баштың чугаалааш, чурттуң Президентизи Владимир Путинниң, Россияның Чазааның удуртулгазының деткимчезиниң, Россияның тудуг болгаш чуртталга-коммунал ажыл-агый сайыды Ирек Энварович Файзуллинниң хууда киржилгезиниң болгаш тудугжуларның кызымаккай күш-ажылының ачызында ол өскерлиишкиннер чедип алдынган дээрзин демдеглээн.
Ирек Файзуллин база хемчегниң киржикчилеринге байырны чедирген. Республика 2020 чылга деңнээрге, 2021 чылдан бээр чүгле чуртталга тудуунуң көргүзүглерин дөрт катап улгаттырганын ол демдеглээн. «Бо дээрге дыка улуг чедиишкин-дир, ынчалза-даа эң-не кол чүүл – дөзевилекчилерниң, тудугжуларның, тудуг организациялырының, чагыкчыларның, шупту муниципалдыг болгаш регионалдыг эрге-чагырга органнарының ажылын организастааны ол түңнелди чедип алырынга дузалаан. Хөй санныг школалар туттунган, хөй чылдарда иштинде доозулбайн турган төлевилелдерни дооскан» - деп, сайыт чугаалаан.
Ирек Файзуллин дашчыларга, бетончуларга, монолитчилерге, профессионал архитекторларга, тудуг бүдүрүлгезиниң ажылдакчыларынга, тудуг ажылдарының организакчыларынга өөрүп четтиргенин илереткен. «Силерге болгаш силерниң өг-бүлеңерге чедиишкиннерни, хей-аътты, быжыг кадыкшылды күзедим. Ажыл-ижиңер дээш четтирдим!» - деп, сайыт чугаалаан.
Россия Федерациязының Тудуг болгаш чуртталга-коммунал ажыл-агый яамызының Өөрүп четтириишкин бижиин бүдүрүкчү бедик чедиишкиннери болгаш үре-түңнелдиг күш-ажылы дээш дараазында мурнакчыларга тывыскан:
- Даваа Алексей Алексеевич – «Суугу» кызыгаарлаттынган харыысалгалыг ниитилелдиң механиги,
- Даргат Любовь Комбуевна – «Өлчей» тускай тудуг» кызыгаарлаттынган харыысалгалыг ниитилелдиң чиңгине директорунуң капитал тудуг талазы-биле оралакчызы,
- Куулар Сайдаш Эрес-оолович – «Суугу» кызыгаарлаттынган харыысалгалыг ниитилелдиң машинист-экскаваторщиги,
- Монгуш Шолбан Оскал-оолович – «Суугу» кызыгаарлаттынган харыысалгалыг ниитилелдиң крановщиги,
- Ооржак Эрес Биче-оолович – «Кызылтудуг» тускай тудуг» кызыгаарлаттынган харыысалгалыг ниитилелдиң кол инженери,
- Хертек Айлаана Шолбан-ооловна – Суугу» кызыгаарлаттынган харыысалгалыг ниитилелдиң бүдүрүлге-техника килдизиниң инженери.
«Тыва Республиканың хоорайлар болгаш суурларның хамааты тудуг, планнаашкын болгаш тудуушкун төлевилел институду» ажык акционерлиг ниитилелдиң техниктиг килдизиниң начальниги Оюн Анатолий Лакпаевичини ак сеткилдиг ажылы, күш-ажылчы чедиишкиннери болгаш тудуг адырын хөгжүдеринге улуг үлүг-хуузу дээш Россия Федерациязының Тудуг болгаш чуртталга-коммунал ачы-дуза яамызының Хүндүлел бижии-биле шаңнаан.
Тыва Республиканың алдарлыг ажылдакчызы Михаил Ким-оолович Кууларга архитектураны хөгжүдеринге шылграңгай чедиишкиннери дээш, «Россияның хүндүлүг архитектору» демдекти тывыскан.
Адырның дөрт төлээзи профессионал байырлалында күрүне шаңналдарын, Тыва Республиканың хүндүлүг аттарын, Тываның Баштыңының мактал бижиктерин алган.
Республиканың тудуг адырының хөгжүлдезинге киирген үлүг-хуузу болгаш ак сеткилдиг ажылы дээш Тываның Баштыңының Өөрүп четтириишкин бижиин «Тыва Республиканың хоорай болгаш суурларының хамааты тудуг, планнаашкын болгаш тудуушкун төлевилел институду» ажык акционерлиг ниитилелдиң архитектору Монгуш Начын Бежендеевичиге тывыскан.
«Кызылтудуг» тускай тудуг» кызыгаарлаттынган харыысалгалыг ниитилелдиң кол бухгалтери Надежда Анатольевна Дегтянниковага албан хүлээлгезин ак сеткилдиг күүседип турары дээш, Тываның Баштыңының Хүндүлел бижиин тывыскан.
«НИК тускай тудуг» кызыгаарлаттынган харыысалгалыг ниитилелдиң чигңине директору Игитханян Норайр Хачикович тудуг адырында ачы-хавыяазы болгаш хөй чылдарда ак сеткилдиг ажылы дээш «Тыва Республиканың алдарлыг тудугжузу» хүндүлүг атка төлептиг болган.
«Трансстрой башкарыкчы компания» кызыгаарлаттынган харыысалгалыг ниитилелдиң чиңгине директору Владислав Анатольевич Андриановка Тыва Республикада тудуг адырының хөгжүлдезинде улуг үлүг-хуузу дээш, «Тыва Республиканың алдарлыг тудугжузу» хүндүлүг атты тывыскан.