Тывада школа назыны четпээн өөредилге инфраструктуразын чаартыр ажылдар уламчылап турар. «Өг-бүле» национал төлевилел күүселдези-биле уруглар кижизидилгезинге болгаш сайзыралынга амгы үениң таарымчалыг байдалдарын тургузуп, уруглар садтарында улуг септелгелерни чорудуп, чаа оран-саваларны тудуп турар.
Эрткен чылын республикада школа назыны четпээн уруглар албан черлерин үндезини-биле чаартыр федералдыг программа боттаныышкыны эгелээн. Мөңгүн-Тайга кожууннуң Мугур-Аксы суурда «Чечек» уруглар сады – «Өг-бүле» национал төлевилелдиң бирги объектизи болган
«Бо дээрге Тываның ырак-узак булуңунда чурттакчыларга эптиг байдалдарын тургузуп, аныяктар төрээн черлеринден чорбазын дээш чорудуп турар өскерлиишкиннеривистиң чүгле бир кезээ-дир» - деп, республиканың Баштыңы Владислав Ховалыг Мөңгүн-Тайга кожуунда социал объектилерни хынап чорааш демдеглээн.
2026 чылда Барыын-Хемчик кожууннуң Кызыл-Мажалык база Чеди-Хөл кожууннуң Ак-Тал суурларында ийи школа назыны четпээн уруглар албан черлеринде септелге ажылдары чоруп турар.
Кызыл-Мажалык суурнуң уруглар садында септелге ажылдары кидин түлүк. Тудугжулар эрги дээвиирни бузуп, чаа соңгалар кастактарын тургузуп, шупту өрээлдерниң шалаларын куткан. Амгы үеде иштики шеверлел ажылдарын кылып, инженер четкилерин эптеп, кожуп турар.
Тудуг ажылдары доосту бээрге, албан черинге амгы үениң дериг-херекселдерин болгаш эт-септи салып, ооң девискээринге уруглар ойнаар чаа шөлдү тудуп, чоок-кавызынга улуг чаагайдылганы кылыр.
Ооң-биле чергелештир регионда школа назыны четпээн уруглар өөредилгезиниң чаа объектилери база туттунар. Кызыл хоорайның Вавилин ээтпээ микрорайонунда 280 олуттуг уруглар садын, хуу инвесторнуң деткимчези-биле Тожу кожуунда 160 олуттуг база бир уруглар садын тудуп турар. Ол ийи объектини 2027 чылда ажыглалче киирери планнаттынган.