Тываның Чазаа арга-арыг өрттерин болдурбас база чурттакчы чонну камгалаарының өртке удур онза чурумун август 16-га чедир узаткан. Өрт сезону эгелээнден бээр регионда беш муң ажыг гектар арга-арыг девискээрлеринге 68 өрттерни өжүрген. «Экологтуг чаагай чорук» национал төлевилелдиң арга-арыгны кадагалап, катап тургузарынче угланган «Арга-арыг камгалалы» федералдыг программаның хемчеглерин күүседири-биле айыыл чок чоруктуң элээн шыңгыы немелде хемчеглерин киирген.
Арга-арыгны камгалап кадагалаар хемчеглер дугайында билиглерни нептередир сорулгалыг «АнтиПожары» федералдыг кампанияны деткип, Тываның арга-арыг яамызы арга-арыгга чорааш, өртке удур айыыл чок чоруктуң эге дүрүмнериниң болгаш өртке удур тускай чурумнуң негелделериниң дугайында медээлерни тарадып турар.
Арга-арыг инспекторлары ажыл-агый объектилери болгаш чурттакчы чон ортузунга 96 ажык кичээлдерни, 2976 беседа болгаш лекцияларны эрттирип, массалыг информация чепсектеринге арга-арыг өрттеринге удур айыыл чок чорукту сагыырының дугайында 900 хире статьяны парлаан, 10 муң ажыг тайылбыр бижиктерни, буклеттерни болгаш брошюраларны үндүрүп, аргалыг черлерге 46 демдектерни, стендтерни болгаш плакаттарны тургускан.
Арга-арыг инспекторлары арга-арыгга кандыг-даа хевирниң оттарын (доскаарларга болгаш оңгарларга безин) кыпсырын, кургаг оът-сиген, бок, будук-чөвүрээ өрттедирин, ажык одаг ажыглаарын, бажың азы тудуглар чанынга мангалга болгаш демирге чем кылырын хораан өртке удур онза чурумнуң дүрүмнерин сагыырын база катап кыйгырган.
Тускай чурум үезинде арга-арыгже чүгле тускай чөпшээрел-биле кирер. Эрттирилгези чок болза, административтиг харыысалгага онаажыр ийикпе, азы элээн улуг түңнүг торгаалды алыр деп, Арга-арыг яамызы дыңнаткан. Хуу кижилерге 40-50 муң рубль, албан-дужаалдыг кижилер 60-90 муң рубль, а юридиктиг черлер 600-1000 муң рубль чедир торгаалдарга онаажыр.
Бир эвес арга иштинге ыш азы өрттү эскерип кагза, Авиаарга-арыг камгалалының регионалдыг диспетчер албанының 8 (39422) 5-04-86 азы 112 дугаарлыг чаңгыс аай телефонунче долгаар.