Июльдуң 31 база август 1-де Тываның тудуг яамызы чээли организациялары болгаш тудуг компанияларының киржилгези-биле шимчевес өнчү ярмарказын эрттирип, чылда 2 хуулуг чиигелделиг ипотека программазы-биле чурттаар оран-сава садыглажылгазын чорудар. Чурттаар шөл садып алыр күзелдиг кижилер чаңгыс черге бар-ла аңгы-аңгы саналдарны өөренип көөр. «Өг-бүле» национал төлевилелдиң ажы-төлдүг өг-бүлелерни чурттаар оран-сава-биле хандырарынга дузалаар кылдыр көрдүнген күрүне деткимчезиниң бо хемчээ-биле бирги рыноктан квартираларны чиигелделиг чээли ставказы-биле садып ап болур.
Тудуг яамызы бо чылын чиигелделиг ипотека долдурарынга 1000 керээни чарар кылдыр доктаатканын сагындырган. Амгы үеде лимиттиң үштүң ийи кезии төнген. Июль 20-ге чедир чиигелделиг ипотека-биле бажың садып ап болур 745 чээли керээзи чардынган.
Шимчевес өнчү ярмарказы Тыва эки турачылар кудумчузунуң 18 бажыңында (1 каът) Улусчу банкының бажыңынга болуп эртер. А август 3-тен 6-га чедир чиигелделиг чуртталга чээлизиниң программазынга киржир негелделериниң дугайында тайылбырны кижи бүрүзү алыр аргалыг.
Тудуг яамызы назы четпээн ийи ажы-төлдүг, азы 6 харга чедир бир уруглуг азы кадыкшылы кызыгаарлыг уруглуг өг-бүлелер киржир программаның кол негелделерин сагындырган:
- ставканың хуузу – 2 хуу;
- чээлиниң эң улуг түңү – 6 млн рублей;
- чээлиниң хуусаазы – 30 чыл;
- чээли алыкчызы база ажы-төлү РФ-тиң хамаатылары;
- бирги рыноктан чурттаар оран-саваны садып алыр;
- тудуг организациязы-биле керээ езугаар эскроу-агар санны ажыглап хуу бажыңны тудар.
Чуртталга чээлизиниң айыттынган ол негелделери чүгле Тывада күштүг дээрзин тудуг яамызы сагындырып турар. Президент Владимир Путинге республиканың Баштыңы Владислав Ховалыгның киирген дилээ-биле регионга ол чиигелдени берген. 2023 чылда эгелээн программа регионнуң социал-экономиктиг хөгжүлдезинге улуг идигни берип, ооң иштинде чуртталга тудуун дүргедедип, боттуң тудуг материалдарының бүдүрүлгезин көвүдедип, республиканың чурттакчыларын чурттаар чер-биле хандырарынга үлүүн киирген.
Бо чылын ниитизи-биле 188 муң дөрбелчин метр шөлдүг, 4132 квартиралыг 60 бажыңны тудуп турар 13 тудуг организациязы чаа тудугларда оран-саваларны бээринге белен. 2026 чылда ниитизи-биле 80,4 муң дөрбелчин метр шөлдүг 23 тудугну ажыглалче киирери планнаттынган.
Бо чылдың октябрь 1-ден өг-бүле ипотеказынче чиигелделиг ставканы ажыглаар хуусааны кызыгаарлаан болгаш өг-бүледе ажы-төлдүң саны-биле аңгы ставка көрдүнген өскертилгелер киирерин Тудуг яамызы дыңнаткан. Ынчангаш деткимчениң амгы негелделерин ажыглаарынга республиканың чурттакчыларында хөй эвес үе арткан.