Дүүн, июльдуң 30-де, Тываның Улусчу фронтузу Россияның чаа регионнарының чурттакчыларынга болгаш тускай шериг операциязында чаңгыс чер чурттугларынга гуманитарлыг дузаның база бир партиязын чыггаш чоруткан. Республиканың Баштыңы Владислав Ховалыг ооң даалгазы-биле чыылданы организастаан дугайында МАХ-та бодунуң каналынга дыңнаткан.
«ЛУР, ДУР, Запорожье, Херсон, Курск, Белгород областарже үш улуг чүък машиназы ниитизи-биле 45 тонна чүъктүг үнүпкен. Бүгү Тыва чүък чорударынга чаңгыс организм ышкаш ажылдаан. Дайынчыларже эң чугула чүүлдерни: техниктиг дериг-херекселдер, камгалал херекселдери, бажың-балгат техниказы, доктар билбес автомобильдерни дамчыткан бис» - деп, ол дыңнадыгда бижээн.
Владислав Ховалыг ачы-дуза акциязынга киришкен республиканың чурттакчыларынга четтиргенин илереткен. Фронт чоогунуң регионнарынга болгаш ында дайынчы даалгалар күүседип турар оолдарга дузалажыры кижиниң хүлээлгези-дир деп дыка хөй кижи санап чоруурун ол демдеглээн. Муң-муң кижилер чаңгыс өг-бүле дег алдынып, тиилелгеге сеткилинден бүзүреп, камгалакчылары аал-чуртунче онча-менди ээп чанып кээрин манап турарлар.
Ачы-дуза чыылдазын удуртуп турар Улусчу фронтунуң регионалдыг штавы шупту кожууннар болгаш хоорай округтары идепкейлиг киржип турарын дыңнаткан. Каа-Хемниң өөредилге эргелелиниң ажылдакчылары дег, чамдыктар акша-хөреңгини өргээн болза, а өскелер чугула херек чүүлдерни боттары саткаш, ТШО-же чүък чыыр пунктуларже чедирип турар. Чижээ, чайгы үеде шериг албанныгларга генераторлар, бензохирээлер, мотоциклдер, электромотоциклдер, квадрокоптерлер, рациялар, тепловизор болгаш эмнер аймаа дыка херек.
Гуманитарлыг дуза чүдүрген автомашиналар бөгүн Кызылдан аъттаныпкан. Чүък сөөртүкчүлери 5 муң ажыг километр орукту эрткеш, хүлээдир черинге ону чедирер.