Тываның Чазаа биле «Эльбрусметалл-Литий» компания социал-экономиктиг кады ажылдажылга дугайында чаа дугуржулганы чарарынга белеткенип турар. Ийи таланың чугаалажып, дугурушканы документ төлевилелинге республиканың Баштыңы Владислав Ховалыг июль 27-де атты салган.
Ол дугуржулга социал болгаш хөй-ниити айтырыгларын шиитпирлээринге ийи таланың идепкейлиг кады ажылдажылгазы-биле Тываның экономиктиг арга-шинээн хөгжүдеринге немелде идигни бээр деп, документиде айыткан. Кады ажылдажылганың кол сорулгалары – Тастыгда литий чыдынын шиңгээдир инвестиция төлевилелин боттандырбышаан, чурттакчы чоннуң чаагай чоруун экижидер.
Даг-болбаазырадылга комбинадында тудуг ажылдары чоруп турар амгы үеде, компания 2028 чылда ооң ажылдап эгелээринге чедир, республикага чылда-ла 25 млн рубль чедир дузаламчыны көргүзери доктааттынган. Ындыг болзажок, «Эльбрусметалл-литий» компанияның социал угланыышкынныг салыышкыннарының хемчээли 2029 чылдан эгелеп 100 млн чедир хенертен өзер.
Дугуржулгада көрдүнген акша-хөреңгини, республика чазааның тургусканы «Деткимче» фондузу таварыштыр, көдээ девискээрлерниң хөгжүлдезинче, өөредилге, культура, спорт адырынче болгаш өске-даа хөй-ниити хереглелдеринче угландырары планнаттынган. Компания оон аңгыда, ажылдап турары девискээри – Эрзин кожуунда социал объектилер септелгезинге акша-хөреңгини чылдың-на тускайлаарын хүлээнип алган.
Ооң мурнунда дугуржуп алганы кады ажылдажылганың негелделери база күштүг бооп арткан. Оларның аразында литий төлевилелиниң бүдүрүлгелеринге специалистер белеткелинге киржип, ажылдаар олуттарның эвээш дизе 50 хуузун тус черниң чурттакчыларынга тускайлаары, компанияга ажылдар кылып, чугула ачы-дузалар көргүзүп, продукция-биле хандырарынче тыва бизнести болгаш бараан бүдүрүкчүлерин хаара тудары база бар.
«Эльбрусметалл-литий» компания республиканың социал болгаш культурлуг төлевилелдеринде идепкейлиг киржип эгелээн. Ооң дузазы-биле Эрзин суурда 850 дөрбелчин метр шөлдүг делгем спорт залын туткан. Бүдүрүлге школалар септелгезин акшаландырып, биче суурларда улуг эвес хүреш залдарын тудуп турар «Эзирлер уязы» регионалдыг төлевилелдиң спонсору.