Тывада «Социал хөмүр» төлевилел-биле чиигелделиг одаар чүүл хандырылгазының дүрүмнеринче өскертилгелерни киирген. Регионнуң Чазаа ол өскертилгелерни быжыглаан чогуур доктаалды 2026 чылдың июль 22-де хүлээп алганын республиканың Күш-ажыл болгаш социал политика яамызы дыңнаткан. Ам хамаатылар документиде айытканы езугаар, хөмүрнүң орнунга акша компенсациязын алыр.
Оон аңгыда, деткимче алыкчыларының даңзызын база калбарткан. Ооң мурнунда дузаны чүгле дөрт азы оон хөй назы четпээн ажы-төлдүг, эвээш орулгалыг өг-бүлелер, тускай шериг операциязының киржикчилери болгаш оларның өг-бүле кежигүннери ап турган. Ам өске бөлүктерниң хамаатылары база компенсацияны ап болур. Чижээлээрге, тускай шериг операцияларынга киржип турган шериг албанныгларның пенсия назылыг ада-иелери база чедери берге Мөңгүн-Тайга кожууннуң чурттакчылыг черлеринде азы Эрзин кожууннуң Качык суурда чурттап турар 50 хардан өрү назылыг (херээжен), 55 хардан өрү (эр улус) бот пенсионерлер аңаа хамааржыр.
Программаның дүрүмнери-биле алырга, 18 хар четпээн дөрт азы оон хөй ажы-төлдүг (азыранды болгаш азырап алган ажы-төлдери-биле кады), эвээш орулгалыг өг-бүлелер, дайынчы хөделиишкиннер хоочуннары болгаш ТШО киржикчилери – балыгланган азы инвалид ТШО киржикчилери, ТШО-га чок болган киржикчилериниң өг-бүле кежигүннери, ол ышкаш туттурган азы ис чок читкен шериг албанныгларның өг-бүлелери компенсацияны ам алыр эргелиин сагындыраал.
Хамаатылар компенсацияны алыр дизе, социал камгалал органнарынче чурттап турар черин бадыткаан документилерни база дараазында хемчээлдиг одаар чүүлдү садып алганының дугайында чегин азы квитанциязын киирер ужурлуг:
* Мөңгүн-Тайга кожууннуң чедери берге чурттакчылыг черлеринде азы Эрзин кожууннуң Качык суурда чаңгыс пенсионерлерден аңгыда, хамаатыларның шупту бөлүктеринге 2,145 тонна хөмүр-даш азы 4,8 куб метр одаар ыяш;
* Мөңгүн-Тайга кожууннуң чедери берге чурттакчылыг черлеинрде азы Эрзин кожууннуң Качык суурда чурттап турар чаңгыс пенсионерлерге 2 тонна хөмүр-даш.
Бо чылын социал дузаже билдириишкин киирген хамаатылар кадыг одаар чүүл садып алганын бадыткаан документини тус черниң социал камгалал органнарынга немей дужаар.
Айтырыглар бар болза, тус черниң күш-ажыл болгаш социал хөгжүлде эргелелинче азы Тыва Республиканың Күш-ажыл болгаш социал политика яамызынче 8 (39422) 2-17-19 дугаарлыг телефон таварыштыр долгааш, билип ап болур.
Чылда чаңгыс катап компенсацияны бээр. Немелде медээлерни болгаш билдириишкинни киирерин max.ru/mintrudrtbot деп шөлүгден билип алыңар.