Тываның Кадык камгалал яамызы 2026 чылдың баштайгы алды айында ажыл-чорудулгазын түңнээн. Чазак даргазының оралакчызы Орлан Сарыгларның киришкени улуг хуралга кандыг чүүлдер чедип алдынганын, эки көргүзүглерлиг болгаш чыл төнчүзүнге чедир шиитпирлээр угланыышкыннарны чугаалашкан.
Демография айтырглары кол черни ээлээн. Бирги чартык чылда республикада 2305 уруг төрүттүнген. Келир үениң ие-чажын деткиир дээш, өг-бүлелерни иштиг болурунга белеткээр ажылдар уламчылавышаан, ЭКО программазы сайзыралды алган, эмчи албан черлеринде эмчи- психологтуг консультация өрээлдери ажылдап турар. Ооң ачызында 96 херээжен дүжүртпес деп шиитпирлээн.
Регионда аарыгларны болдурбазынче улуг кичээнгейни салдынган. Чыл эгезинден бээр 63 муң ажыг кижи эмчи диспансеризациязын болгаш профилактиктиг шинчилгелерни эрткен. 1,9 муң хире аарыгларны үезинде илередип, аарыг кижилерни эмчи хайгааралында алган.
Туберкулезка удур демиселде көргүзүглер эки. Эрткен чылдың ол-ла үезинге деңнээрге, аарыгның нептерээни 34,3 хуу эвээжээн, уруглар аразында аарыыр чаа таварылгалар саны 42 хуу баткан. Аарыгны эртежик тодарадып, профилактиктиг шинчилгелерни калбартканы-биле ындыг түңнел чедип алдынган.
Тускай шериг операциязының киржикчилеринге болгаш оларның өг-бүлелеринге эмчи дузазын көргүзери - аңгы угланыышкын. Сөөлгү чартык чылда тускай шериг операциязының 2,5 муң ажыг киржикчилери ол ачы-дузаны алганын регионнуң Кадык камгалал яамызы дыңнаткан. Олар эмнээшкинни, эмчи реабилитациязын, санаторлуг-курорт эмнээшкинин, стоматологтуг болгаш психологтуг дузаны ап турар.
Республикада чаа национал төлевилелдер күүселдези уламчылавышаан. Элээн каш угланыышкыннарда көргүзүглер планнаттынган сорулгаларны ажа берген. Эмчи реабилитациязынче хаара тудары элээн каш катап көвүдээн, чигир аарыгларының школаларында өөренип турар аарыг кижилер саны көвүдээн, аарыг кижилерни диспансерлиг хайгааралга алыры болгаш чүрек-дамыр аарыгларын болдурбазының планнары ажыр күүсеттинген.
Кадык камгалалының чурагайжыдылгазы сайзыраан. Эмчилер аарыгны тодарадып шинчилээринге кылымал угаанны ажыглап турар, ол ышкаш телемедицина болгаш электроннуг ачы-дузалар калбарган.
Республиканың чурттакчылары МАХ национал мессенджер таварыштыр 30 муң катап эмчиниң хүлээп алыышкынынче бижиткен.
Коллегия хуралының киржикчилери түңнелдерни үндүрүп тура, ийиги чартык чылда демографтыг көргүзүглерни экижидер, өлүм-чидимни эвээжедир, профилактиктиг медицинаны, туберкулезка удур демиселди хөгжүдер, эмчи дузазының шынарын болгаш чедингирин бедидер, ТШО киржикчилерин болгаш оларның өг-бүлелерин деткиир ажылдарны ам-даа уламчылаары кол айтырыглар бооп артарын демдеглээннер.