Август 1-ден эгелеп Тываның аңчылары бөрүлерни аглап аңнап болур. ТР-ниң күрүнениң аңныыр хайгааралының комитеди федералдыг чурум ёзугаар, ол хүнден эгелеп араатан аңга спортчу аңнаашкынны чөпшээрээн. Ук сезон сес ай үргүлчүлеп, март 31-де төнер.
Бөрү аңнаарынга чөпшээрелди алыр дизе, аңчы кижи ТР-ның күрүнениң аңныыр хайгааралының комитединге аңчы биледин көргүскеш, аңнаар чөпшээрел алырынче билдириишкинни киирер.
Тывада бөрү аңнаарынга кызыгаарлаашкынны күш чок болдурган, чүге дизе бо хүнде бөрүлерниң саны 1 муң гектар черге 0,05 баш турар тургаш, ол көргүзүгнү ашкан. А республиканың эрге-чагыргазы бөрү аңнаарын деткип, улуг кокай дээш 10 муң рубльди, бөрзээнге 3 муң рубльди төлеп турар.
Тываның мал ажыл-агыйрынга бөрүлер улуг когаралды чедирип турарын барымдаалааш, араатан аңны аглаарын калбартып, ону узуткааны дээш акша төлевирлерин доктаатканы ол. Чүгле 2026 чылдың эгезинден бээр азыг диштиг араатаннар 400 хире баш малды туткан. Сөөлгү 15 чылда азырал амытаннарже бөрүлер халдаанындан ниити когаралдың түңү 1 млрд хире рубль болган.
Республика чазааның тускай шиитпири-биле Тывада бо араатанның санын өйлеп-чурумчудар дээш, аңныыр сезонундан аңгы үеде база аңнап болурун чөпшээрээн. Ол ажылче профессионал болгаш улуг арга-дуржулгалыг аңчыларны хаара тудуп, ТР-ниң Аңныыр күрүне комитединден егерьлер болгаш инспекторлар баштаан көжүп чоруур бригадаларны тургузуп турар.
Комитеттиң дыңнатканы-биле алырга, 2026 чылдың эгезинден бээр аңчылар бригадалары 266 бөрүнү узуткаан. Бүгү Тываның девискээринде бөрүлер санын чогуур деңнелге, азы 900 башка тудар дизе, ам-даа 40 хире кокайны чок кылыр. 10 чыл бурунгаар оларның саны 3 муң ажып турганын сагындыраал.