Республика Баштыңы Владислав Ховалыг бодунуң албан езузунуң блогунда, сөөлгү чылдарда Тывада 50 ажыг спортчу объектилер туттунган деп дыңнаткан. Россияның Президентизи Владимир Путинниң даалгазын күүседип, «Россияның спорту» күрүне программазы-биле бүгү чуртта ышкаш, регионда спортчу инфраструктураның улуг чаартылгазы амгы үеде чоруп турарын ол онзалап демдеглээн.
Күрүне Баштыңының айтыышкынын республика идепкейлиг күүседип турар. Хөй санныг уругларның хостуг үезинде дыштанылгазын хандырган бажыңнар чанында бичии спортчу шөлдерден эгелээш, көдээ чурттакчыларга спорт-биле ойнаар байдалдарны тургускан шывыглыг спорт залдары база бүдүн республиканың он чыл дургузунда манап келгени регионда эң улуг «Победа» спорт-культура комплекизинге чедир туттунган спортчу объектилерниң хемчээли болгаш статузу аңгы-аңгы. Чурттакчыларны спортчу объектилер-биле хандырары 80 хуу ажа берген.
«Бистиң ажы-төлүвүс, аныяктарывыс, улуг улузувус бажыңының чоогунга күш-культуржу шимчээшкинни кылып болур. Массалыг болгаш нептереңгей спортчу угланыышкыннарны база тускай шериг операциязының хоочуннарын деткиирин, чурттакчы бүрүзү бодунга тааржыр мергежилгелерни тып алыр байдалдарны тургузарын уламчылап турар бис» - деп, Владислав Ховалыг демдеглээн.
Амгы үеде республика девискээринде элээн каш «Эзирлер уязы» спорт залдары туттунуп турар. Бо чылын чаңгыс аай хевирлиг ол объектиниң сес тудуу эгелээн, Сарыг-Сеп биле Аянгатыда залдарны албан езузу-биле ажыткан. «Эльбрусметалл-литий» компанияның инвестиция деткимчези-биле Кызыл-Даг, Бай-Даг, Чыраа-Бажы, Самагалтай, Кызыл-Тайга, Ак-Тал суурларда ам-даа алды спорт зал тудуу уламчылап турар.
Аңгы-аңгы чурттакчылыг черлеринде өске-даа спортчу объектилерде ажылдар чоруп турар. Оларның аразында «угаанныг» спорт шөлдери, ГТО шөлдери, модульдуг болгаш ангарлыг залдар, хүреш шөлдери болгаш эштир бассейн дээн ышкаш улуг объектилер бар. Оон аңгыда амгы объектилерде улуг чаартылгалар чоруп, республиканың спорт школаларының дериг-херекселдери чаартынып турар.
2021 чылдан бээр регионнуң спортчу инфраструктуразынга 150 ажыг чаа объект немешкен. Чурттакчы чонга таарымчалыг байдалдарны тургузары база оларны кадык амыдыралче хаара тудары Тыва Чазактың мурнады боттандырар угланыышкыны болуп артпышаан.
«Россияның спорту» күрүне программазы российжилерниң күш-дамыр сайзыралынга байдалдарны тургузар, массалыг спортту нептередир, амыдырал-чуртталгазының шынарын бедидер, чоннуң кадыын быжыктырар сорулгалыг. Программа Россия Федерациязының Президентизиниң шиитпири-биле 2025 чылдан эгелеп күүсеттинип турар.