Тываның Баштыңы Владислав Ховалыг бодунуң блогунда дыңнатканы болза, чаа Улусчу программаже регионнар чурттакчыларындан үш миллион ажыг эгелекчи саналдар кирген, 2021 чылдың көргүзүүнден хөй. «Чаңгыс демниг Россияның» Эксперт чөвүлелиниң хуралынга партияның даргазы Дмитрий Медведев санал-оналдар чыылдазының чамдык түңнелдерин үндүрүп, ол медээлерни дыңнаткан. Улусчу программа чурттуң мурнунга тургустунган кол айтырыгларны шиитпирлээр ужурлуг деп ол айыткан. Ада-чурттуң айыыл чок чоруун хандырары, Тиилелгени чоокшуладыр дээш тулчуп чоруур кижилерге бүгү талалыг деткимчени көргүзери – эң кол чүүлдерниң бирээзи.
Регионнуң хөгжүлдези, тускай шериг операцияларының киржикчилерин болгаш оларның өг-бүлелерин деткиири, камгалал адырының эртем-техниктиг күчү-күжүн быжыглаары, ыраккы черлерде транспорт болгаш логистика инфраструктуразын, хоорай хүрээлеңин, социал ачы-дузаларны болгаш энергетиканы хөгжүдери – чыып белеткээр документиниң кол угланыышкыннарынга хамааржыр. Күрүне камгалалының чагыгларын күүседиринче болгаш шеригни амгы үениң ок-чепсээ-биле хандырарынче онза кичээнгейни угландырар.
Россияның регионнарының аразында хөгжүлдениң ылгалын эвээжедиринче, өг-бүлелерге амыдырап-чурттаарының таарымчалыг байдалдарын тургузарынче, кадык камгалалын, өөредилгени болгаш улуг назылыг кижилерни деткииринче хөй санал-оналдар киргенин Медведев дыңнаткан.
Энергетика болгаш ырак-узак девискээрлерни хөгжүдер талазы-биле эгелээшкиннер Тывага база онза чугула дээрзин Владислав Ховалыг бодунуң блогунда демдеглээн. «Программада тодаргай базымнар: фельдшер-акушер пунктуларын тудар, медицинага «угаанныг» технологияларны ажыглаар, республиканың аңгы-аңгы чурттакчылыг черлеринге таарымчалыг байдалды тургузар дээш ажылдаар бис» - деп, ол немээн. Чурттакчыларның санал-оналдары кирген программа езулуг-ла ажылчын документ болурун республика баштыңы демдеглээн.
Улусчу программаже Тываның чурттакчыларындан 6700 ажыг эгелекчи саналдар кирген. Дилеглерниң хөй кезии уругларже сагыш човаашкынга хамааржыр – школалар, уруглар садтары, хөй-ниити төптери, библиотекалар, спорт залдарын тудуп, чаартырын, ол ышкаш уруглар ойнаар шөлдерни чаагайжыдарын чон дилээн. Оруктарны асфальтылаары ийи дугаарында нептереңгей айтырыг. Үшкү кол дилег – ТШO киржикчилеринге болгаш оларның өг-бүлелеринге деткимче хемчеглерин көвүдедири. Оон ыңай, башкылар болгаш эмчилерниң акша-шалыңын өстүрерин дилеп турар. Экология айтырыглары, ылаңгыя Кызыл чоок-кавының агаарын арыглаары база көдүрүлген.
«Чаңгыс демниг Россия» партияның стратегтиг документизи – Улусчу программа күүсекчи эрге-чагырга органнары-биле кады боттандырары хамаатыларның амыдырал-чуртталгазының шупту адырларын хаара тудуп турар. Ол дээрге российжилерниң амыдырал-чуртталгазын экижидер, оларның чугула сонуургалдарын барымдаалап чорудар ажылдар планы-дыр. Программаның долу киржикчилери болганда, хамаатылар ону тургузарынга, боттандырарынга, ооң түңнелдерин контрольдаар ажылдарга киржир.
Естьрезультат.рф деп платформада хамаатыларның санал-оналдар чыылдазы ам-даа чоруп турар. Тываның чурттакчылары боттарының эгелекчи санал-оналдарын Улусчу программаже киирип, төнчү документини тургузарынга үлүг-хуузун киирип болур.