«Чедер» санаторлуг курорт комплекизиниң девискээринде турум мобильдиг харылзааны болгаш дүрген ажылдаар интернет четкизин бир дугаар киирген. «Туризм болгаш хүндүлээчел чорук» национал төлевилелдиң турисчи инфраструктураны хөгжүдер программазы езугаар чаа станция баазазын тургускан.
Кадыкшылга чериниң девискээринде «Мегафон» оператор станциязы ажылдап эгелээн. Амгы үеде курорттуң аалчылары 4G мобильдиг интернетти ажыглап, VoLTE технология-биле үннүг долгаашкыннарны кылып, күрүне болгаш банк ачы-дузаларынче кирип, чоок кижилери-биле харылзажып, чуруктар болгаш видеоларны үлежип, чугула медээлерни онлайн таварыштыр көрүп турар.
Чедер хөл – Кызылдан 45 километр ыракта чыдар регионалдыг бойдус тураскаалы. Ол эмнээр малгажы болгаш минералдыг суу-биле алдаржаан. Бүдүн чыл дургузунда кадык камгалал комплеки ажылдап, чылдың-на Тывадан болгаш чурттуң өске-даа регионнарындан муң-муң аалчыларны хүлээп ап турар.
«Бедик шынарлыг харылзаа – амгы үениң турисчи инфраструктуразының бөгүнде чугула кезээ-дир. Чурагай ачы-дузаларын ажыглаарынга, чоок кижилери-биле харылзажырынга, аян-чорук чорааш үзел-бодалын үлежиринге, чедери берге бойдус чурумалдыг черлерге безин харылзаага турарынга 4G четки дузалаар» - деп, Тываның чурагайлыг хөгжүлде болгаш харылзаа сайыды Эдуард Ховалыг демдеглээн.
Мегафоннуң регионалдыг салбырының директору Светлана Симаткинаның дыңнатканы болза, Амгы үеде регионнуң суг чоогунда туткан дөрткү турисчи чери Чедер хөл болур болгаш, компания ында турум ажылдаар шынарлыг LTE харылзаа четкизин киирген. Кадыкшылга чериниң девискээринде мобильдиг интернеттиң дүргени секундада 100 Мбит чедип турар болганындан, амгы үениң чурагай ачы-дузаларын хала чок ажыглаар арга тургустунган деп, оператор айыткан.
Регионалдыг күрүнениң туризм комитединиң удуртукчузу Алексей Сиорпас иштики туризмни хөгжүдеринге амгы үениң инфраструктуразын тудары идигни бээрин демдеглээн.
«Чедер» санаторийи – республикада эң нептереңгей кадыкшылга черлериниң бирээзи. Эрткен чылын аңаа 8,5 муң хире кижи дыштанган, а бо сезонда оларның саны ам-даа көвүдээр ужурлуг. Шынарлыг мобильдиг харылзааны кииргени аалчыларга оон-даа таарымчалыг байдалдарны бээр» - деп, Алексей Сиорпас демдеглээш, амгы үениң курорт дыштанылгазының чугула көргүзүүнге шынарлыг мобильдиг харылзаазы албан турарын айыткан.