Июльдуң 24-25 хүннеринде Омск хоорайга Россия биле Казахстанның регионнар аразында кады ажылдажылганың XXII форуму болуп эрткен. Чурттуң Президентизи Владимир Путин ук форумнуң хемчеглеринге киришкен. Россия биле Казахстанның улуг логистика коридорларын хевирлээринге, транспорт инфраструктуразын кады хөгжүдеринге, транзит араг-курлавырларын ажыдарынга кады эштежилге айтырыглары форумнуң кол темазы болган.
«Форумнуң логистика талазы-биле хүн чуруму Чөөн чүкче угланыышкынныг улуг шилчилгениң байдалда бистиң республикага стратегтиг ужур-уткалыг. Тываның географтыг туружу кызыгаар таварты чаа маршруттарны тудар арганы берип турар» - деп, Владислав Ховалыг форумга киржилгезиниң түңнелдери-биле МАХ-та бодунуң каналында демдеглээн. Тываның Баштыңы республика келир үеде логистика системазында Азияже кирер кол хаалга деп бодун санап турарын база айыткан.
Россияның Президентизи Владимир Путинниң пленарлыг хуралга илеткелинде чугаалааны-биле алырга, форум логистика темазындан аңгыда, аңгы-аңгы угланыышкыннарга регионнар аразында бот-боттарынга ажыктыг харылзааларны улам быжыглаарының чаа идеяларын болгаш эгелээшкиннерин сайгарган.
Тываның даштыкы садыг-саарылга ажыл-чорудулгазынга Казахстан шынап-ла улуг үлүгнү ээлеп турар. Чамдык чылдарда республиканың ниити экспортунуң 50 хуузу ынаар чоруп турган. Тыва болгаш казах сайгарлыкчылар садыг-саарылга-биле чергелештир турисчи төлевилелдерде боттарының күжүн кады шенеп турар. Өөредилге болгаш культура адырларында удур-дедир харылзаа тургустунган. Тыва Казахстанның, Моолдуң болгаш өске-даа чурттарның регионнары кирип турар «Бистиң ниити бажыңывыс – Алтай» делегей чергелиг координация чөвүлелинде база кирип турар.
Тыва биле Казахстанны ажыл-агыйжы болгаш культурлуг харылзаалардан аңгы чүүлдер база харылзаштырган деп, республика Баштыңы санаан.
«Географтыг туруш талазы-биле муң-муң километр ырак-даа болзувусса, түрк ниити делегейге хамааржыр бис. Бистиң чоннарывыстың төөгү, дыл-домаа, культура талазы-биле төрелдешкээ узун хуусаалыг болгаш бот-боттарынга ажыктыг кады ажылдажылганың таваан тургузуп турар» - деп, Владислав Ховалыг бодунуң блогунда бижээн.