Бо чылдың эгезинден бээр тускай шериг операциязының 42 хоочуннары социал керээ программазы-биле «Хууда сайгарлыкчы ажыл-чорудулганы боттандырары» угланыышкында конкурс шилилгезин чедиишкинниг эрткен. Кижи бүрүзү боттарының бизнезин ажыдарынга азы хөгжүдеринге 350 муң рубль түңнүг саң-хөө деткимчезин алган. «Өг-бүле» национал төлевилели-биле хамаатыларга көрдүнген социал керээ - күрүнениң деткимче хемчеглери амыдыралдың берге байдалынга таварышкан кижилерниң амыдырал-чуртталгазының шынарын экижидер сорулгалыг.
«Россияда ажыл» регионалдыг кадрлар төвүнүң демдеглээни-биле алырга, хемчегже дайынчы хөделиишкиннер хоочуннарын хөйү-биле хаара тудар дээш, ТШО киржикчилеринге өг-бүлениң орулгазын көрбес кылдыр социал керээни чарарының бөдүүнчүткен негелдезин киирген.
Программа киржикчизи Леонид Ховалыгныӊ ажыл-ижи – чедиишкинниг старттыӊ бир чижээ. Ол 2022 чылда Сахалин облазынга шериг керээзин чаргаш, ТШО зоназынче аъттанган. Албан хүлээлгезин эрттирип тургаш, ол аар кемдээшкинни алгаш, 3-кү бөлүктүң инвалиди болган. Тускай шериг операциязының зоназындан чанып келгеш, хамааты амыдыралга катап чаңчыгар ужурга таварышкан. Шагдагы-ла күзели – бодунуң пилорамазын ажыдары. Ол «Ада-чурттуң камгалакчылары» күрүне фондузунче болгаш Тыва Республиканың «Россияда ажыл» кадрлар төвүнге дуза болгаш деткимче дилеп, билдириишкинни киирген.
Кадрлар төвүнүң специалистери Леонид Ховалыгга бизнес-планны тургузарындан эгелээш, комиссия эртеринге чедир бүгү талалыг дузаны көргүскен. Леонид бодунуң төлевилелин чедиишкинниг камгалааш, субсидия акшазы-биле ыяш дилдирер дериг-херекселдерни садып алган.
Амгы үеде Леонид Ховалыгның бүдүрүлгези бирги чагыын доозуп турар.
«Ажылымга таарзындым. Күзелимни боттандырарынга болгаш чуртталгамның чаа эгезин эгелээринге дузалаан күрүне деткимчези дээш өөрүп четтирдим» - деп, ол өөрүшкүзүн үлешкен.
Күрүне деткимчезиниң алыкчызы кышкы соок эгелээриниң мурнунда одаар ыяш чедирилгезин организастап, ТШО киржикчилериниң өг-бүлелеринге ачы-дузазын көргүзер деп планнаан.