Кызылда Улусчу чогаадылга бажыңынга, национал байырлал Наадым чоннуң байырлалынга тураскааткан байырлыг хурал үезинде, агроүлетпүр комплекизиниң марнакчыларынга күрүне шаңналдарын тывыскан. Тываның Чазааның Даргазының оралакчызы Алексей Сазан-оол байырлыг хемчегниң киржикчилеринге Тываның Баштыңы Владислав Ховалыгның өмүнээзинден байырны чедирген.
Байырлыг хуралдың хүндүлүг аалчылары кылдыр Наадымның чемпионнары – республиканың бүгү-ле булуңнарында ажылдап чурттап чоруур, боттарының арга-мергежили, ажылгыр-кежээзи база көскү чедиишкиннери-биле ады-сураа алгый берген мурнакчы көдээ ишчилерни, ооң иштинде хойжулар, чылгычылар, сарлыкчылар, ивижилер, малчыннарны чалаан. Оларның эң тергииннери бөгүн Россия Федерациязының Көдээ ажыл-агый яамызының, Тыва Республиканың Баштыңының, ТР-ниң Дээди Хуралының база Тываның Көдээ ажыл-агый яамызының шаңналдарынга төлептиг болган.
Мөңгүн-Тайга кожууннуң «Сайзырал» көдээ ажыл-агый бүдүрүлге кооперативиниң даргазы Куулар Сайлык Конзаевнага агроүлетпүр комплекизиниң системазында хөй чылдарда ак сеткилдиг ажылы дээш, Россия Федерациязының Көдээ ажыл-агый яамызының Хүндүлел бижиин тывыскан.
Россия Федерациязының Көдээ ажыл-агый яамызының Өөрүп четтириишкин бижиин хөй чылдарда агроүлетпүр комплекизинге ак сеткилдиг ажылдап келгени дээш, дараазында көдээ ишчилер алган:
- Очур-оол Лариса Санчааевна – Республиканың ветеринария төвүнүң Таңдыда салбырының мал эмчизи,
- Бопар-оол Олег Хертекович – Республиканың ветеринария төвүнүң Барыын-Хемчикте салбырының мал эмчизи.
Көдээ ажыл-агыйын хөгжүдеринге үлүг-хуузу болгаш үре-түңнелдиг ажылы дээш Тыва Республиканың Баштыңының Өөрүп четтириишкин бижиин тывыскан:
- Монгуш Буян Михайлович – Кызыл кожууннуң Сукпак суурда тараачын-арат ажыл-агыйның баштыңы, хуу сайгарлыкчы;
- Чамыян Айлык Геннадьевна – Чеди-Хөл кожууннуң «Кужур-Бажы» көдээ ажыл-агый кооперативиниң даргазы.
Тыва Республиканың Баштыңының Хүндүлел бижиин көдээ ажыл-агый адарында хөй чылдарда ак сеткилдиг ажылы дээш дараазында ишчилерге тывыскан:
- Бады Булат Владимирович – Улуг-Хем кожууннуң Торгалыг сумузунда тараачын-арат ажыл-агыйның баштыңы;
- Идам Анна Васильевна – Тере-Хөл кожууннуң Эми сумузунда хууда дузалал ажыл-агыйының баштыңы;
- Монгуш Лилия Тангытовна – Россияның эртемнер академиязының Сибирьниң федералдыг агробиотехнологтуг эртем төвүнүң филиалы – Тываның көдээ ажыл-агый эртем-шинчилел институдунуң мал чеми бүдүрүлгези болгаш чер ажылы лабораториязының улуг эртем ажылдакчы;
- Сундуй Айдомир Артурович – Тере-Хөл кожууннуң Шынаа сумузунда тараачын-арат ажыл-агыйның баштыңы;
- Хомушку Аяс Анатольевич – Кызыл кожууннуң Кур-өЧер суурда хууда дузалал ажыл-агыйының баштыңы.
Мөңгүн-Тайга кожууннуң «Бай-Белдир» көдээ ажыл-агый хереглекчилер кооперативиниң даргазы Салчак Ачыты Чудурович көдээ ажыл-агый адырында ачы-хавыяазы болгаш хөй чылдарда ак сеткилдиг ажылы дээш «Тыва Республиканың көдээ ажыл-агыйының алдарлыг ажылдакчызы» хүндүлүг атты алган.
Республиканың билдингир чогаадыкчы коллективтериниң болгаш уран чүүл мастерлериниң байырлыг концерти-биле байырлалдың хемчээн уламчылаан.