Тываның Баштыңы Владислав Ховалыг регионда өртке удур онза чурум чоруп турар үеде республиканың чурттакчыларынга улуг харыысалгалыг болурун кыйгырган.
«Тывага өрт сезон эгелээнден бээр 5 муң ажыг гектар арга-арыгны узуткаттынган. Кижилерниң серемчилел чок чоруу-биле өрттерниң 90 хуузу өөскээн» - деп, республика баштыңы социал четкилерде бодунуң арыннарында бижээн. Онза чурум үезинде чоннуң арга-арыгларже кирерин шыңгыы хораан дээрзин ол сагындырган. «Кандыг-даа одаг болгаш оът-сиген өрттедип болбас. Октапкан таакпы артынчызы азы уттундурган шил сава безин улуг айыыл-халапты үндүрүп болур. Кижи бүрүзүн аңаа эң-не улуг харыысалгалыг болурун дилеп тур мен» - деп, Баштың бижээн.
Владислав Ховалыг «Экологтуг чаагай чорук» национал төлевилели-биле регионнуң өрт өжүрер болгаш арга-арыг техниказының парыгын чылдың-на чаартып турза-даа, чурттакчы чоннуң билиишкини чокта, эң сөөлгү үениң амгы машиналары-даа бойдусту камгалап шыдавас дээрзин демдеглээн.
Регионалдыг Чазактың шиитпири-биле Тывада өртке удур онза чурум июль 26-га чедир күштүг дээрзин сагындыраал. Ол дээрге өрттерни болдурбазынче база кижилерни камгалаарынче угланган түр үениң хемчээ-дир. Бүгү үениң дургузунда арга-арыгже чадаг-даа, кандыг-даа транспорт-биле баары хоруглуг. Чүгле тускай эрттирилге бижиктиг барып болур. Арга-арыгга болгаш ол чоогу девискээрлерге одаг кыпсыры, бок болгаш кургаг оът-сиген өрттедири, от-биле ажылдар кылыры хоруглуг. Бо негелделерни хажытканы дээш торгаалдар улуг, аар уржуктарлыг таварылгада - кеземче харыысалгазынга онаажыр.