Россияда эң-не улуг литий чыдымының бирээзи — Тастыг чыдынында даг-болбаазырадылга комбинадының тудуу эгелээн. Июль 22-де Тываның Баштыңы Владислав Ховалыг тудугнуң ажыл-чорудулгазы-биле таныжып четкеш, ол черден бирги кадрларны социал четкиде бодунуң арнынга салган.
Даг-болбаазырадылга комбинадының тудуунда ажылдап турар ажылчыннарның 120 ажыы — Тываның чурттакчылары. Литий чыдымы бар Сенгилең сынның дагларлыг черинде ажылчыннар сууржугажын туткан. Бо хүнде Тастыг-Ойда комбинаттың руда үүрмектээр болгаш болбаазырадыр кол бүдүрүлге корпустарының демир-бетон ханалары каракка көзүлдүр-ле туттунуп үнүп келген.
2028 чылда бүдүрүлге ажылдап эгелээр. 2029 чылда ол бодунуң төлевилелде көрдүнген долу күчүзүнче үнер ужурлуг. 596 муң тонна литий оскидиниң чиг эт курлавыры бар кылдыр шинчилеттинген черни ажык арга-биле 27 чыл иштинде болбаазырадыр. Инвестор-биле чарган дугуржулгада даг-болбаазырадылга комбинадының ажылдакчыларының чартык кезээ Тываның чурттакчылары болурун айтып быжыглаан. «Чаңгыс чер чурттугларым төрээн чурттунга доктаамал болгаш төлептиг ажылдыг болуру меңээ дыка чугула» — деп, Тываның Баштыңы демдеглээн.
Тастыгже сургакчылаашкын үезинде, Тываның Баштыңы Владислав Ховалыгны «Ареал» бөлүүнүң чиңгине директору Владислав Свиблов үдеп чораан. Ооң чугаазы-биле алырга, Тастыгда даг-болбаазырадылга комбинады-биле тудуг ажылдары кызыгаарлаттынмас. Оон аңгыда, медицинадан эгелээш, аккумляторлар, смартфоннарның экраннары, ок өтпес шилдер, индукциялыг плиталарның панельдери дээш, оон-даа өске бедик технологиялыг чүүлдер бүдүрүлгезинге калбаа-биле ажыглаар арыг литий дустары азы «ак нефть» бүдүрер заводту тудары планнаттынган.