Бөгүн Тос-Булакка республика малчыннарның кол байырлалы - Наадым-2026-ны байырлыг езу-биле ажыткан. Тываның чурттакчылары болгаш аалчылары, шупту муниципалдыг тургузуглардан делегациялар байырлалга чыглып келген. Кожууннар баштыңнары болгаш оларның төлээлери боттарының девискээрлериниң туктарын көдүрүп алгаш, чыскаалып алгаш марштап эрткеннер.
Тываның Чазааның Даргазының оралакчызы Алексей Сазан-оол байырлалдың ажыттынганы-биле чыылганнарга байырны чедирген. Наадым дээрге чүгле чырык культурлуг болуушкун эвес, а амыдыралын мал ажыл-агыйынга тураскааткан кижилерниң күш-ажылынга, төрээн черинге бердингенинге, көшкүн үндезин амыдыралдың ужур-чаңчылдарын кадагалап арттырганынга ханы хүндүткелдиң мөгейиишкини дээрзин демдеглээн.
Чаңчыл езугаар бо хүн күрүне шаңналдарын тыпсыр езулалды база эрттирген. Бии-Хем кожуундан Суград Айыы, Барыын-Хемчик кожуундан Сылдыс-оол Каваа биле Андрей Содунам «Тыва Республиканың алдарлыг чылгычызы» хүндүлүг аттарга төлептиг болган.
Ажыдыышкынның эң-не кайгамчык болгаш езу-чаңчылдарлыг болуушкуннарының бирээзи - ыдык Саңны салганы болган. Байырлыг езулалга республика Чазааның Даргазының оралакчызы Алексей Сазан-оол, Тываның Улустуң хөөмейжилери, мерген адыгжылар, эрткен чылдың аът чарыштарының тиилекчилери киришкен. Саңны кыпсыпкан соонда, күчү-шыдалды, эрес-дидим чорукту болгаш салгалдарның уламчызын йөрээген аътка хүндүткелди илередип база чадан согунну адар чараш езулалды кылган.
Байырлал программазы үш хонук уламчылаар. Июльдуң 23, 24 хүннеринде Тос-Булакка аъттар чарыштары, а Кызылга Тываның эр болгаш херээжен спортчуларының чиик атлетика чемпионады, тыва чадан баг адар, хөл шыдыраа оюннары, стол теннизинге маргылдаалар, «Кажык» национал оюннар база 18 харга чедир мөгелер хүрежи болуп эртер.
Шыырак мөгелер аразынга Тыва Республиканың хүреш маргылдаазы - Наадымның эң солун кезээ болур. Эң хөй аарыкчыларны хаара тудар көрүштүг болуушкуннарының бирээзи – тыва хүреш маргылдаазы июльдуң 25-те Кызылдың «Хүреш» стадионунче бүгү чонну чалап тур.