Келир четверг - июль 23-те, малчыннарның Наадым байырлалының кол хемчеглери эгелээр. Байырлалдың спортчу кезээ чиик атлетика маргылдаазы-биле ажыттынар, аңаа киржикчилер Каа-Хем суурже углай чадаг-терге оруу-биле 21 километр чартык узун марафонну маңнаар. Ол-ла хүн Тос-Булакка Тыва Республиканың аът чарыжының болгаш чаа адарының маргылдааларын байырлыы-биле ажыдар. Аалчылар болгаш киржикчилерге садыг-саарылга баартыктарын, уруглар аттракционнарын, концерт программазын организастаар.
Июль 23 база 24 хүннеринде аът чарыжы болгаш ча адар маргылдаалар ийи хонук үргүлчүлээр. Аът чарыжын сес аңгы салыгга салыр. Кара адарының маргылдаалары хууда бирги чер болгаш команда дээш эртер. Республикада байырлал хүнү кылдыр чарлаан июльдуң 24-те Аныяктар ордузунга тыва шыдыраага республика чемпионады болур. Ол-ла хүн Улусчу чогаадылга бажыңынга мал ажыл-агыйының мурнакчыларын болгаш агроүлетпүр комплекизинге көскү үре-түңнелдерни чедип алган көдээ ишчилерге шаңналдарны байырлыг байдалга тыпсыр. Наадымга тураскааткан байырлал концерти база аңаа болур. Июльдуң 23-те Чазак бажыңынга чамдык малчыннарны база шаңнап-мактаар.
«Хүреш» стадионунга чаңчыл ёзугаар эртер хүреш маргылдаазы ийи хонук уламчылаар: пятницада, июльдуң 24-те, аныяк мөгелер болгаш хоочуннарга ийи аңгы маргылдааны планнаан, а июльдуң 25-те республиканың эң күштүг 128 мөгелери хүрежир.
Наадым-2026 байырлалдың кол хемчеглер программазы
Июль 23
07:00
Эр болгаш херээжен спортчулар ортузунга чиик атлетикага Тыва Республиканың чемпионады – Кызыл хоорай, чадаг-терге оруу;
08:00
Аът чарыжынга Тыва Республиканың чемпионады (4 салыг: аныяк чүгүрүк, улуг чүгүрүк, тыва аъттар, аскырлар) – Тос-Булакка;
10:00
Тыва ча адарынга Тыва Республиканың чемпионады: эр улус аразынга «Тыва Ча адар оюн: баг адар хевири», херээженнер аразынга «Тыва Ча адар оюн: борбаанды адар хевири» – Тос-Булакка.
Июль 24
10:00
Аът чарыжынга Тыва Республиканың чемпионады (4 салыг: аныяк челер аъттар, аныяк чыраа, улуг челер, улуг чыраа аъттар) – Тос-Булакка;
10:00
Тыва ча адарынга Тыва Республиканың чемпионады: эр командалар аразынга «Тыва ча адар оюн: баг адар хевири» – Тос-Булакка;
10:00
Эр болгаш херээжен шыдыраачылар ортузунга «Хөл-шыдыраага» Тыва Республиканың чемпионады – Аныяктар ордузунга;
10:00
18 харга чедир аныяк мөгелерниң тыва хүрешке Тыва Республиканың бирги чери дээш маргылдаазы – «Хүреш» стадионунга;
14:00
Хоочун мөгелерниң тыва хүрешке республика маргылдаазы – «Хүреш» стадионунга;
14:30
«Наадым-2026» малчыннарның чоннуң байырлалынга тураскааткан байырлыг хурал – Улусчу чогаадылга бажыңы.
Июль 25
12:00
Шыырак мөгелерниң тыва хүрешке Тыва Республиканың чемпионады – «Хүреш» стадионунга.