.jpg)
Июль 20-де Тываның Чазааның бажыңынга 2026 чылдың тергиин дээн школа доозукчуларынга байыр чедирген чаңчылчаан байырлал болуп эрткен. Чаңгыс аай күрүне шылгалдазының түңнелдери-биле алырга, оларның 107-зи өөредилгезинге чедиишкиннери дээш алдын, а 102-зи мөңгүн медальдар-биле шаңнаткан. Тываның Чазааның Даргазының бирги оралакчызы Алексей Сазан-оол республика Баштыңының өмүнээзинден аныяк оолдар, кыстарга бир дугаар шыңгыы болгаш улуг шаңналы-биле байырны чедирген.
Тываның Баштыңының өмүнээзинден медаль алганнарга, оларның ада-иелеринге база башкыларынга мындыг кайгамчык үре-түңнелдерни берген кады ажылы дээш өөрүп четтиргенин илереткен. «Медальдар – силерниң өөредилгеже шыңгыы хамаарылгаңарның херечизи-дир. Ол дээш кезээде чоргаарланыр силер дээрзинге бүзүрээр мен» - деп, байыр чедириишкининде демдеглээн.
База ол ышкаш Владислав Ховалыгның байыр чедириишкининде аныяктарның чедиишкиннери – өөредилге системазының хөгжүлдезинге болгаш аныяк салгалды кижизидеринге дыка хөйнү кылып турар бүгү республиканың ачы-хавыяазы-дыр деп демдеглээн. Сөөлгү беш чылда Тывада чаа 11 школа туттунган, 50 ажыг школалар септеттинип-чаартынган. Кичээлдер солун болгаш таарымчалыг эрттирер кылдыр амгы үениң дериг-херекселдери-биле оларны чепсеглээн.
Тываның Баштыңының өмүнээзинден Алексей Сазан-оол шилип алганы өөредилге черлеринче, күзеп чорууру мергежилдеринче болгаш профессияларынче чедиишкинниг дужаап кирерин шупту доозукчуларга күзээн. Ол күзелдер бөгүн үлетпүр хөгжүлдезиниң эң-не бедиинде турар төрээн Тывазының хереглелдери-биле дүгжүп турар дээрзинге бүзүрелин илередип, ылаңгыя инженерлер, тудугжулар, экономистер, дөзевилекчилер, IT-технология специалистери, геодезистер болгаш өске-даа техниктиг угланыышкынныг мергежилдер дыка херегин демдеглээн.
«Төрээн Тываңарже ээп чанып келгеш, ону улам хөгжүдүп, эгелеп алган чүүлдеривисти уламчылаарыңарга идегеп тур мен» - деп, дарганың оралакчызы доозукчуларга чагаан.