Тыва Республикада «Россияда ажыл» кадрлар төвү дээди өөредилге черлеринге тускай сорулгалыг өөредилге олуттарынче документилер дужаары июль 25-ке чедир ам-даа уламчылап турарын дыңнаткан. Тускай сорулгалыг өөредилге дээрге, бюджет олуттарынче аңгы конкурс-биле киржир арганы берген эптиг арга-дыр. Абитуриентилер дээди өөредилге черин доозуптарга, ажылчын олутту магадылаар, өөредилге үезинде практика эртер аргалыы, чамдык таварылгаларда чагыкчы компания стипендияны төлеп база бээр.
Ажыл берикчилеринден ажылдар саналдаан база абитуриентилерден чагыглар киирген «Россияда ажыл» шөлдүң дыңнатканы-биле алырга, республикада кадык камгалал, көдээ ажыл-агый, экономика, эрге-хоойлу, тудуг болгаш өөредилге дээн ышкаш адырларда специалистерге хереглел улуг. Дээди өөредилге программалары-биле 430 олутка тускай сорулгалыг өөредип бээр дугайында ажыл берикчилеринден 221 санал киргенин Тываның абитуриентилерге дыңнаткан.
Регионалдыг Өөредилге яамызы, Кадык камгалал яамызы, Экономиктиг сайзырал болгаш үлетпүр яамызы, Арга-арыг болгаш бойдус ажыглалының яамызы, Көдээ ажыл-агый яамызы, Сан-чурагайлыг хөгжүлде яамызы, Саң-хөө яамызы, Тудуг яамызы, а ол ышкаш янзы-бүрү албан черлери болгаш организациялар, ооң иштинде «Азас» күрүнениң бойдус заповедниги, Суд департаментизиниң эргелели, Роспотребнадзорнуң Тыва Республикада эргелели, «Россети Сибирь Тываэнерго» АН, «Суугу» КХН, Ветеринария албаны, Таңды кожуун чагыргазыболгаш өскелер-даа черлер чагыгларны киирген.
Тускай сорулгалыг олуттарже документилер дужаарынга ам-даа бир неделя бар. Ону кылырда, РФ-тиң Эртем болгаш дээди өөредилге яамызының тайылбырлааны-биле, чуруму мындыг элээн каш базымнарны кылыр херек:
1. «Госуслуги» деп порталче (www.gosuslugi.ru/vuzonline) киргеш, шилип алган дээди өөредилге черинче билдириишкинни киирер.
2. Тускай сорулгалыг өөредилгени шилип алыңар: билдириишкиниңерге тускай сорулгалыг олуттарже кириксеп турарын айтыр.
3. «Россияда ажыл» деп платформада (trudvsem.ru/target-edu) азы дээди өөредилге черлериниң сайтыларында чагыкчыларның саналдарын өөренип көргеш, тааржырын шилип алыңар.
4. Дээди өөредилге черлерин болгаш конкурс бөлүктерин шилээш, тускай сорулгалыг квота езугаар конкурсту айтыңар.
Июльдуң 25-ке чедир билдириишкинни болгаш документилерни дужаар ужурлуг, ынчалза-даа ВУЗ оон эрте хуусааны айтып болур болганда, ооң сайтызындан ону тодарадып алыңар.
Билип алыры чугула: тускай сорулгалыг квота конкурузунуң чүгле чаңгызын шилир, ол чагыг киирикчизиниң саналынга дүгжүп турар ужурлуг.
5. Дээди өөредилге чериниң сайтызында конкурс даңзызындан бодуңарның олудуңарны хынап туруңар.
6. Хүлээп алырынга чөпшээрел бээри: бир эвес конкурсту эрте берген болзуңарза, август 1-ниң 12:00 шакка чедир (Москва шагы-биле) Госуслуги таварыштыр азы дээди өөредилге черинче хүлээп алырынга чөпшээрешкен дыңнадыыңарны киирерин утпаңар.
7. Хүлээп алырын манаары: Госуслуги порталынга азы дээди өөредилге чериниң сайтызынга хүлээп алганының дугайында дыңнадыгны манаңар.
8. Керээ чарары: өөредилге чылы эгелээр мурнунда чагыкчы-биле тускай сорулгалыг өөредилге керээзин чарар силер («Госключ» деп капсырылга таварыштыр азы дорт чагыкчы-биле).
Камгалал-үлетпүр комплекизиниң бүдүрүлгелеринден саналдарга тускай негелделер барынче кичээнгейни салыңар. Ооң дугайында тодаргай медээни чагыкчыдан азы дээди өөредилге чериниң хүлээп алыышкын комиссиязындан билип ап болур.
Дужаап кирериниң чурумунга азы өске-даа айтырыгларга харыыларны «Приём в вуз» чаңгыс аай контакт-төптүң изиг шугумунуң 8-800-301-44-55, азы Россияның Өөредилге болгаш эртем яамызының 8-800-222-55-71 азы 8-800-100-20-17 телефоннарынче (онлайн дужаап кирери) долгааш, билип болур.