Чайгы үеде уругларны ажыктыг дыштанылгаже хаара туткан немелде өөредилге төптериниң, культура албан черлериниң, спортчу болгаш социал деткимче албан черлериниң баазазында түр үениң дыштанылга төптериниң ийиги сезону бо хонуктарда доостур. Сезонда 20 муң хире уруглар дыштанылганың бо хевиринче хаара туттунган. Уруглар түр үениң дыштанылга төптеринге айыыл чок чоруктуң, назы четпээннерниң кемдеп-берттиишкинин болгаш корум-чурум үрээшкиннерин болдурбазының дүрүмнерин шиңгээдип, катаптаан.
Эрткен чылдарда ышкаш, өөредилге, культура, спорт, күш-ажыл болгаш социал политика яамылары түр үениң дыштанылга төптерин организастаан. Айыылдыг байдалда өг-бүлелерден уругларны, ол ышкаш тускай шериг операциязының киржикчилериниң ажы-төлүн дыштанылгаже хаара тудары – кол угланыышкын бооп арткан.
Өөредилге яамызы 17 түр үениң дыштанылга төптерин ажылдаткан. Ук төптер уругларның чогаадыкчы, угаан-медерел болгаш спортчу арга-шинээн ажыдып, командага ажылдаарын, лидер шынарларны болгаш хамааты харыысалганы хевирлээр ажылдарны чорудуп турар. Уруг бүрүзү бодунуң сонуургалдарынга тааржыр кичээлдерни алыр кылдыр өөредиглиг, профессионал угланыышкынныг болгаш кижизидилгелиг программаларны тургускан.
Республиканың муниципалдыг тургузуг бүрүзүнде ажылдап турар түр үениң дыштанылга төптериниң долу даңзызын яамының vk.ru/wall-38636573_58255 деп арынындан көрүп болур.
Тываның культура албан черлери бо сезонда түр үениң 122 дыштанылга төвүн ажылдаткан. Июль 19-та ийиги сезон төнер болза, август 1-де үшкү сөөлгү сезон эгелээр. Культура яамызы түр үениң дыштанылга төптери тускай угланыышкынныг болгаш темалыг ажылдап турарын демдеглээн.
Бо чылын дыштанылга сезонунуң хемчеглери колдуунда Чоннуң чаңгыс деминиң чылынга тураскааттынган. Ол ышкаш айыыл чок чорук айтырыгларынче онза кичээнгейни салган. Шимченгир оюннар, викториналар, мөөрейлер дээн ышкаш, солун хемчеглер таварыштыр сугга, орукка, поход үезинде азы манавааны онза байдалдарда алдынарының дүрүмнеринге уругларны өөреткен. Культура яамызының vk.ru/wall-20358661_87912 социал четкилеринде дыштанылга төптериниң долу даңзызын ажылдаар шагы-биле салган.
Спорт яамызы чайгы кадыкшылга кампаниязының үезинде түр үениң дыштаныр 30 төвүн организастаан, оларның 10-у «Эзирлер уязы» спорт залдарында ажыттынган. Спорт яамызы 7 хардан 17 харга чедир назылыг 11 муң ажыг уругну, ооң иштинде кайнаар-даа хаара туттунмаан спортчу оолдар, уругларны шупту 5 сезонда хаара тударын планнаан. Үшкү сезон июль 21-де доостур, а дөрткү сезон июль 23-те ажыттынар, ынчангаш спортка сонуургалдыг уруглар үр үениң дыштанылга төптеринче бижидип алыр үези ам-даа бар.
Тренерлер амыдыралдың кадык овур-хевирин нептередир, республикада спорттуң төөгүзү, корум-чурум үрээшкиннерин болдурбазы, патриотчу кижизидилге угланыышкыннары-биле ажылдаар.
Бо чайын Күш-ажыл болгаш социал политика яамызы Чеди-Хөл биле Чаа-Хөл кожууннарда Өг-бүле болгаш уругларның социал дуза төптериниң баазаларында уругларның дыштанылга төптерин ажыткан. Берге бөлүкке хамааржыр өг-бүлелерден 100 хире уругларны сезон бүрүзүнде хаара тудар.
Чай дургузунда Тываның школачылары дагдыныкчыларының хайгааралы-биле дыштанылга төптеринге хүннүң-не чаа чүүлдерни билип, мага-бодун сайзырадып, ынак спортчу хевирлеринге киржип, солун бөлгүмнерге болгаш чогаадыкчы мастер-класстарга барып, аңгы-аңгы мөөрейлерге киржип турар» - деп, чайгы кадыкшылга кампаниязын харыылап турар Өөредилге яамызы демдеглээн.