Владислав Ховалыг Москвага ажылчын сургакчылаашкын үезинде «Лукойл» ПАН-ның кол күүсекчи директору Сергей Кочурков-биле ужурашкан. Ийи тала кады ажылдажылганың угланыышкыннарын, ооң иштинде регионда кывар-чаар чүүл хандырылгазын айтырыын чугаалашкан.
«Компания республиканы дизельдиг кывар-чаар чүүл-биле хандырарын деткиир болгаш дузалажыр деп дугуржулганы чедип алдывыс. Бистиң регионда транспорт комплекизиниң турум ажылдаарын, көдээ ажыл-агыйны деткииринге болгаш амгы сезоннуг ажылдарны бүзүрелдиг доозарынга улуг деткимче-дир» - деп, Владислав Ховалыг ужуражылга соонда МАКС-та бодунуң каналынга чугаалаан.
Республика Баштыңы стратегтиг чугула бо айтырыгга регионну деткээни дээш Сергей Кочурков баштаан «Лукойл» командазынга четтиргенин илереткен.
Бүгү чуртта одаар чүүл өртектери өскенинден, демир-оруктуг кожа регионнарга деңнээрге, сөөртүр-чедирер өртектериниң өзүп турары-биле Тыва Республика арай нарын байдалда. Чүге дизе киир сөөртүп турар чиг эт үлүү болгаш транспорт чарыгдалдары улуг болганындан регионнуң аъш-чем хандырылгазынче онза кичээнгей херек.
Владислав Ховалыгның кывар-чаар чүүлдүң чедишпезиниң айтырыын шиитпирлээр база одаар чүүлдүң өртээн өйлеп-таарыштырар дээн даалгазы езугаар, Тыва Республиканың Одалга болгаш энергетика яамызы улуг нефть компанияларының заправкалар санын регионга көвүдедир хемчеглерни ажылдап турар.
Амгы үеде республиканың кывар-чаар чүүл рыногунда улуг компаниялардан «Роснефть компания» ПАН ажылдап турар. Автозаправкалар санын көвүдедип, четкизин калбартыр дугайында саналды Владислав Ховалыг июнь төнчүзүнде компанияның удуртулгазынга киирген. Россияның Чазааның Даргазының оралакчызы Александр Новак Тываның удуртулгазының дилээн деткээн.