Бөгүн, июль 1-де, Кызылдың Тиилелге шөлүнге Дайынчы хөделиишкиннер хоочуннарының хүнүн демдеглеп, байырлыг митингини эрттирген.
Тываның Чазааның кежигүннери, депутаттар, чепсектиг күштер тургузугларының, «Ада-чурт камгалакчылары» күрүне фондузунуң регионалдыг салбырының удуртулгазы, афган, чечен дайынының база тускай шериг операциязының хоочуннары, «Тываның маадырлары» кадрлар программаның доозукчулары төрээн чурту дээш тулчуушкуннарга бажын салган маадырларны хүндүткээн.
Ада-чуртун камгалаар шериг албан-хүлээлгезин күүседип, Россия дээш дайынчы хөделиишкиннерге киржип тургаш, маадырлыы-биле амы-тынындан чарылган дайынчыларны сактып, кажыыдалдың минутазын чарлаан.
Митингиниң киржикчилери Девискээр дайыннарынга база шериг чөрүлдээлеринге дириг арткан болгаш амы-тынындан чарылган Тываның оолдарының тураскаалынга чечектерни салган.
ТР-ниң Чазак Даргазының оралакчызы Шолбан Сендаш дайынчы хөделиишкиннер хоочуннарынга байыр чедиргеш, Тускай шериг операциязының хоочуннар ассоциациязының кежигүн шынзылгаларын, «Ажыл-херекке шынчы чоруу дээш», «Тускай шериг операциязынга киришкени дээш» медальдарны тывыскан.
Тускай шериг операциязының хоочуну Ачыты-Мерген Шожал дайынчы хөделиишкиннер девискээринче 2022 чылда чоруткан. «Бөгүн Дайынчы хөделиишкиннер хоочуннарының хүнүн улуг акыларывыс-биле кады демдеглээри чоргааранчыг-дыр. Бис оларның изин дидими-биле изеп чор бис. Дайынчы хөделиишкиннер хоочуннарының маадырлыг чоруун өзүп орар салгалдарга дамчыдары – бистиң хүлээлгевис» – деп, ол чугаалаан.
Эрткен чылын Тыва Республиканың Сактыышкыннар болгаш байырлалдар хүннериниң календарында Дайынчы хөделиишкиннер хоочуннарының хүнү немешкенин сагындыраал. Сактыышкын хүнүн июль 1-де демдеглеп турар. Чаа регион байырлалы – Ада-чуртун камгалакчыларының ачы-хавыяазын үнелээринге, өзүп орар салгалга чоргааралды оттурарынга чугула базым.
Бистиң чаңгыс чер-чурттугларывыс Кореяга, Вьетнамга, Сирияга, Египетке, Мозамбикке, Анголага, Югославияга база Совет Эвилелиниң республикаларынга 30 ажыг шериг чөрүлдээге киржип, Соңгу Кавказка делегей терроризминге удурланып, осетин чонга удур халдаашкынны чылча шаап, амгы үеде тускай шериг операциязында киржип турарлар.
