Москвага ажыл-агыйжы сургакчылаашкынга чорааш, Тываның Баштыңы Владислав Ховалыг Россияның Чазаанга элээн каш ужуражыышкыннарны эрттирген.
РФ-тиң Чазааның Даргазының оралакчызы Александр Новак Тываның Баштыңы Владислав Ховалыгны хүлээп, Тываның бензин-биле хандырылгазын сайгарып чугаалашкан. “Роснефть” компанияның Тываже бензинни киир сөөртүрүнүң хемчээлин көвүдедир деп шиитпирин Александр Новак чүүлдүг деп көрген, республиканың социал болгаш үлетпүр адырларын электри энергиязы-биле хандырылгазын күштелдирер 220 кВт күчүлүг электри шугумнарының тудуун дүргедедиринге деткимчени көргүзерин аазаан.
Владислав Ховалыг-биле ужуражыышкын үезинде РФ-тиң Чазааның Даргазының оралакчызы Марат Хуснуллин республикада чуртталга тудуу дүргедээнин онзалап демдеглээш, ооң темпизин оожумнатпас, ам-даа күжениишкинниг ажылдаарының чугулазын айыткан.
Регионда оруктар тудуунуң байдалын база сайгарып көргеннер. Тываның кол оруктарының узуну ниитизи-биле 1062 километр, ооң 70 хире хуузун автотранспорт оруктарынга негелделерге дүүштүр чаартканын эки көргүзүг деп Марат Хуснуллин демдеглеп, федералдыг таладан херек деткимчени чедирери ам-даа уламчылаар деп чугаалаан.
Республикада кывар-чаар чүүлдер-биле хандырылгада байдал нарын. Кызыл хоорайда станцияларда бензин өртээниң хенертен улгатпас чоруун «Роснефть» компанияның 2 станциязы тудуп турар. Кожууннарда станцияларда бензин хандырылгазы үзүктелир таварылгалар бар.
Москвага ажыл-агыйжы сургакчылаашкынга чорааш, Россия Федерациязының энергетика сайыды Сергей Цивилёвка Тываның баштыңы Владислав Ховалыг ужурашкан. Тываже демир-орук харылзаазының чогун, республикаже чүъктерни чүгле автотранспорт-биле киир сөөртүп турарын барымдаалааш, регионнуң кывар-чаар материалдар-биле хандырылгазын көвүдедирин чогумчалыг арга-биле шиитпирлээрин сайыт Цивилёв аазаан.
РФ-тиң тудуг болгаш чуртталга-коммунал ажыл-агый сайыды Ирек Файзуллин-биле Тываның Баштыңы ужурашкаш, республикага чаа Перинаталдыг төптү тударының айтырыын сайгарып чугаалашкан. Тыва Россияда чаш ажы-төлдүң төрүттүнери хөй регион болганда, чогумчалыг демографтыг деңнелди кудулатпазы-биле, чаш уругларның чаа оран-савазын тудары чугула деп Ирек Файзуллин демдеглээн. 115 оруннуг Перинаталдыг төптү Тыва Республиканың социал-экономиктиг хөгжүлдезиниң хууда программазының акша-хөреңгизи-биле тударын планнаан.
Ирек Файзуллин биле Владислав Ховалыг регионда тудуг болгаш чуртталга-коммунал ажыл-агыйны болгаш өске-даа чугула айтырыгларга хамаарыштыр сайгарылгалыг чугааны чорутканнар.
Тываның социал-экономиктиг чедиишкиннерин федералдыг төпте чогууру-биле үнелеп, ол чедиишкиннерни улам бурунгаарладыр дээш, РФ-тиң Чазааның, федералдыг яамыларның талазындан деткимче регионга улуг дуза дээрзин Владислав Ховалыг демдеглээн.
