Бо хүнден, июньнуң 17-ден эгелеп, Тывада «Бүгү чүвени Тиилелге дээш!» Улусчу полктуң волонтер форумнары эгелээн. Регионнуң Баштыңы Владислав Ховалыгның деткимчези-биле бүгү-российжи Улусчу фронтунуң регионалдыг салбыры болгаш республиканың эрге-чагыргазы шупту кожууннарга хемчеглерни организастап эрттирер. Бир дугаар форум бөгүн Мөңгүн-Тайга кожуунга ажылын эгелээн. А июльдуң 16-да Кызылга сөөлгү форум планнаттынган. Тываның Дээди Хуралы (парламентизи), Хөй-ниити палатазы, Ада-чурттуң дайынчыларының өг-бүлелер комитеди кампанияны деткээн. Тускай шериг операциязының киржикчилерин болгаш оларның өг-бүлелерин деткээн херээжен чонну каттыштырган «Чаңгыс демниг Россияның» херээженнер шимчээшкини – форумнуң партнеру.
Форумнарның кол сорулгазы – бүгү республикага волонтержу ажыл-чорудулганы хөгжүдеринге идигни бээр Улусчу полктуң эки турачыларын херээженнер шимчээшкининиң идепкейжилери-биле каттыштырары. База бир чугула айтырыг – чурттакчы чоннуң көдээ девискээрлерни хөгжүдер дээн инициативаларынче база шериг албанныгларны деткиир немелде хемчеглеринче кичээнгейни углап, Улусчу программаны чыыр.
Бүгү чуртта Улусчу программаже санал-оналдар чыылдазы уламчылап турар, бо хүнге чедир ийи миллион хире инициативалар кирген. Тываның Баштыңы Владислав Ховалыг ол санал-оналдардан «бистиң ажылывыстың угланыышкынын тодараткан хамаатыларның манааны боттуг кезээн» хевирлээри-дир деп демдеглээн. «Чаңгыс демниг Россия» партияның даргазы Дмитрий Медведев эксперт чөвүлелиниң хуралынга, чаарттынган Улусчу программаның үндезинин тургузар кол айтырыгларны айыткан.
«Тывада удур-дедир харылзааның принциптерин шыңгыы сагып, федералдыг сорулгаларны регионалдыг шиитпирлеринче ажылдап турар бис. Чурттаар оран-сава болгаш транспорттуң чедингири - республиканың мурнады хөгжүдер угланыышкыннары болуп артпышаан. Ол угланыышкыннар делгем хөгжүлдениң, кадрлар чедишпезиниң база демография айтырыгларын шиитпирлээр арганы берип турар» – деп, республиканың Баштыңы демдеглээн.
Президентиниң даалгазы-биле регионда эгелээн 2 хуулуг ипотека программазы Тывада чурттаар оран-сава талазы-биле чидиг айтырыгны чедиишкинниг шиитпирлеп турарын ол немээн.
Республикада транспорттуң чедингир эвезин эвээжедири-биле тускай сорулгалыг ажылдар база чоруп турар. Ол угланыышкында Кызыл – Улан-Батор маршруттуг авиа-аргыжылганы ажытканы, чугула базым болган. Кызылдың аэропорту делегей чергелиг эрге-байдалды алгаш, чурттакчыларга Азия чурттарынче эптиг харылзааларны болгаш ужудуушкуннарны ажыткан.
Эксперт чөвүлелинге айыткан чаа стратегтиг угланыышкыннарны Тываның онзагай байдалынга таарыштырар деп, республика баштыңы демдеглээн. «Чурттакчыларның амгы хереглелдеринге долузу-биле үндезилеттинген регионнуң хөгжүлде программазын тургузары – кол сорулга» – деп, Владислав Ховалыг демдеглээн.
Волонтерлар форумнарынга арга-дуржулга солчулгалыг мастер-класстарны, темалыг шөлдерни организастап, активчилерге шаңнал-макталдарны тыпсыр. Оон аңгыда муниципалитеттерге чаа волонтер пунктуларын ажыдарын саналдаан. Бөгүн форум Мөңгүн-Тайга кожууннуң Мугур-Аксы суурда болуп турар, дараазында Хандагайты, Тээли, Ак-Довурак, Кызыл-Мажалык, Суг-Аксы дээш, оон-даа өске суурларга эртер.
Улусчу фронтунуң дыңнатканы болза, амгы үеде Тывада 120 ажыг Улусчу полктуң волонтер пунктулары ажылдап турар. Улуг-Хем кожуунда эки турачылар шимчээшкини эң-не идепкейлиг, а Таңдының Балгазын суурнуң чурттакчылары Тывада эки турачы ажылды бир дугаарында организастаан. Республикада волонтер шимчээшкиннериниң активчилери сентябрь эгезинде регионалдыг шуулганга чыглыр.