Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Россияның Эртемнер академиязының Сибирь салбырының Г.И. Будкер аттыг Ядерлиг физиканың институдунуң директорунуң хүлээлгезин күүседип турар Павел Логачев-биле ажылчын байдалда ужурашкан.
Ужуражылганың кол төвү «СКИФ» коллективтиг ажыглал төвүн ажылдадып эгелээриниң хүнү болган. Павел Логачев бүдүн комплексти болгаш төп шыгжамыр черин ажылдарынга белеткелдиң сөөлгү чадазы чоруп турарын бүрүн эргелиг төлээге дыңнаткан. «Синхротроннуг херелдениишкинниң бирги шенелдезин авугст айда чорудары – бистиң сорулгавыс» - деп, ол чугаалаан.
«Хуусаа дыка кыска. Төлевилелдиң шупту киржикчилери — керээ чарган талаларга, чагыкчыга, Ростехнадзор болгаш өске-даа ведомстволар төнчү үре-түңнелди чедип алыр дээш, демниг болгаш дээштиг ажылдаары чугула» — деп, Анатолий Серышев чугаалаан. Даалга дыка нарын, ындыг хемчээлдиг төлевилел амгы Россияның төөгүзүнде бир дугаар боттанып турар. Баш бурунгаар чугаалаары берге, ынчалза-даа кижи бүрүзү сорулгазын чедип алыр дээш, шыдаар шаа-биле ажылдап турар деп, бүрүн эргелиг төлээ немээн.
Ооң мурнунда бүрүн эргелиг төлээниң аппарадынга «СКИФ» коллективтиг ажыглал төвүнүң тудуунга хамаарышкан ээлчеглиг ажылчын хурал болуп эрткен. Анатолий Серышевтиң дааалгазы-биле ону бүрүн эргелиг төлээниң оралакчызы Вадим Головко удуртуп эрттирген. Тудуг организацияларның болгаш чагыкчының төлээлери аңаа киржип, амгы үеде объектиде ажылдар дугайында илеткээн.